काठमाडौं (हाम्रो खेलकुद)– ए डिभिजन क्लब हिमालय शेर्पा राजधानीमा जारी प्रथम चन्द्रागिरी गोल्डकप फुटबल प्रतियोगिताको सेमिफाइनल पुगेको छ । चन्द्रागिरी नगरपालिकाको नैकाप मैदानमा आज भएको खेलमा एपिएफको ‘बी’ टिमलाई ३–० ले हराउँदै अन्तिम चारमा पुगेको हो । 

हिमालेनको जितमा राष्ट्रिय टोलीका सदस्य हेमन गुरुङ २ र अफ्रिकी मुलका पियुष हेनरीले १ गोल गरे । हिमालयनले फाइनल प्रवेशका लागि अर्को विभागिय टोली त्रिभुवन आर्मीको बी टोलीको सामना गर्नेछ । आर्मी र एपिएफको सिनियर टोली भने झापाको झिलझिलेमा जारी सताक्षी गोल्ड कप फुटबल प्रतियोगिताको क्वार्टरफाइनलमा शनिबार भिड्दैछन् ।

हेमनले पहिलो गोल १४ औं मिनेटमा गरेका थिए । पेनाल्टी बक्समा बाहिरबाट शसक्त प्रहार गर्दा एपिएफका गोलकिपर अमृत चौधरीले रोक्ने कुनै मौका नै पाएनन् । खेलमा पछि परेपछि एपिएफले सुधारिएको प्रदर्शन गरेको थियो । तर, गोल फर्काउनका सकेन ।

हेमनले ७४ औं मिनेटमा अर्को गोल थपे । राष्ट्रिय टोलीका अर्का सदस्य मान बहादुर तामाङको पासमा विपक्षीका ती रक्षकलाई विट गर्दै हेमनले गोल गरेका थिए । त्यो बेला एपिएफका गोलकिपर अमृत अघि बढिसकेकालाई गोल गर्न हेमनलाई थप सहज भएको थियो ।
खेल सकिन तीन मिनेट बाँकी रहँदा रक्षापक्ति र गोलकिपरको तालमेल नमिल्दा हेनरीले गोल थप्दै जित निश्चित पारे ।

एपिएफले केही मौका खेल फालेको थियो । टोलीका आशिष लामाले ५० औं मिनेटमा मौका पाए, तर गोल गर्न सकेनन् । ५२ औं मिनेट विक्की लामाले पनि अवसरको उपयोग गर्न सकेनन् । ६१ औं मिनेटमा एपिएफका सुनिल लामाको फ्रिकिक यू–१९ का कप्तान गोलकिपर अपर्ण कार्कीले पन्च गरे ।

खेल सकिन ४ मिनेट बाँकी रहँदा सुनिलले अर्को आक्रमण गरे त्यसलाई पनि अपर्णले सफल हुन दिएनन् । हिमालयनका मानले दुई पटक गोलको अवसर पाए , तर सफल भएनन् । ५३ औं मिनेटमा उनको प्रहारर्लाइ विपक्षी रक्षकले रोके भने ७० औं मिनेटमा पाएको मौका उनले खेर फाले । ब्राइट युथ क्लबको आयोजनामा जारी प्रतियागितामा शनिबार पहिलो सेमिफाइनलमा ए डिभिजन टोली फ्रेन्ड्स र सिएमजी क्लब संकटाबीच प्रतिस्पर्धा हुनेछ ।

नेपाल जनरल मार्केट (हिरो) को मुख्य प्रायोजन, चन्द्रागिरी नगरपालिका, युनाइटेड सिमेन्ट प्रायोजक रहेको प्रतियोगिताको विजेताले उपाधिसहित ५ लाख र दास्रो हुने टोलीले २ लाख ५० हजार रुपैयाँ प्राप्त गर्नेछ । प्रतियोगिताको उत्कृष्ट खेलाडी र सर्वाधिक गोलकर्ताले समान ३० हजार पाउनेछन् । फाइनल मंसिर ५ गते हुनेछ ।

चन्द्रागिरी गोल्ड कपको पहिलो सेमिफाइनल शनिबार

फ्रेण्डस र सिएमजी संकटा