पेरिस (एजेन्सी)– पेरिस सेन्ट जर्मेन (पिएसजी) का प्रशिक्षक उनाइ एम्रीले नेयमारको सरुवातका विषयमा प्रतिक्रिया दिदै उनी कतै नजाने प्रष्ट पारेका छन् । पछिल्ला केहि साता नेयमार रियल म्याड्रिड जाने हल्ला व्यापक रुपमा चलेको छ ।

बार्सिलोनाबाट पिएसजी गएयताका दिनहरु ब्राजिलियन स्टारका लागि सहज रहेका छैनन् । लियोनसँगको खेलका क्रममा पेनाल्टी हान्ने विषयमा इडिन्सन काभानीसँगको विवादको चर्चा बारम्बार हुने गरेको छ । जसका कारण दुवै खेलाडी क्लबबाट अन्यत्र जान चाहेको हल्ला पनि बेला बखत चल्ने गरेको छ ।

रियलका कप्तान सर्जियो रामोसले पनि हालै नेयमारलाई क्लबमा हेर्न चाहेको बताएका थिए । ‘हामी उत्कृष्ट खेलाडी चाहन्छौं त्यसमा नेयमार एक हो’ रामोसले भनेका थिए, ‘मलाई लाग्छ उनी फरक खेलाडी हुन् र उनको आगमनले फरकपन आउनेछ । यो सबै उनमा निर्भर गर्छ । यदि उनी डिसेम्बरमा आए भने त्यो झन् राम्रो हुने छ । बार्सिलोनाबाट सिधै रियल म्याड्रिड आउनुभन्दा पहिले पिएसजी जाँदा उनलाई सहज भएको होला ।’

उता पिएसजीका प्रशिक्षक एम्रीले भने सबै अनुमानलाई गलत भन्दै उनी कतै नजानेमा जोड दिएका छन् । ‘हामीले उनलाई बार्सिलोनाबाट एउटा लक्ष्यका साथ लिएका हौं । क्लब र अध्यक्ष पनि उनी यहि बसेको हेर्न चाहन्छन् । उनी यहि बस्नेछन्’ एम्रीले भने, ‘मैले नेयमारसँग कुरा गरे । यो सबै हल्ला हो । हामी उनलाई सबै खाले सहयोग गर्न तयार छौं । ’

एम्रीले जस्तो दाबी गरेपनि नेयमार रियल जाने धेरै खाले अनुमान भने जारी छन् । क्रिस्टियानो रोनाल्डोले क्लब छोड्ने सम्भावना यथावत रहँदा रियलले उनको विकल्पका रुपमा नेयमार हेरिएको बताइन्छ ।