मोनाको (एजेन्सी) – फ्रेन्च लिग १ को पहिलो स्थानमा रहेको पेरिस सेन्ट जर्मन (पिएसजी) आज दोस्रोमा रहेको मोनाकोसँग भिड्दै छ । मोनाकोको घरेलु मैदानमा खेलिने यस खेल नेपाली समय अनुसार १.४५ बजे सुरु हुने छ ।
पिएसजीका लागि थोमस म्युनियर टोलीमा फर्किँदै छन् भने जाभियर पास्टोरेले मिडफिल्डमा स्थान पाउने देखिन्छ । मोनाकोबाटै लोनमा रहेका किलियन बाप्पेले अग्रपंक्तिमा एडिन्सन काभानी र नेयमारको साथ दिने छन् ।
मोनाकोका लागि स्टेभेन जोभेटिच, जिब्रिल सिडिबे र थोमस लेमार सामान्य घाइते छन् । यस सिजन १२ खेल खेलिसकेको मोनाकोको २९ अंक रहेको छ । त्यस्तै पिएसजीको भने उत्तिकै खेलमा ३५ अंक छ ।
पिएसजीले आज खेल जितेमा सो अन्तर ९ अंकको हुने छ भने घरेलु टोलीको जितमा सो अन्तर ३ अंकमा छोटिने छ । यी दुई बीच खेलिएको पछिल्लो खेलमा पिएसजी २-१ ले विजयी रहेको थियो ।
