म्याड्रिड (एजेन्सी) – गए राति च्याम्पियन्स लिगको समूह एच अन्तर्गत रियल म्याड्रिडले बोरुसिया डोर्टमण्डलाई ३-२ ले हराएको छ । घरेलु टोलीको जितमा लुकास भाज्क्वेजले निर्णायक गोल गरे ।

रियलका लागि बोर्जा मायोरल र क्रिस्टियानो रोमाल्डोले गोल गर्दै टोलीलाई २-० को अग्रता दिलाएका थिए । तर पिएर एम्रिक अबामियाङले दुई गोल गर्दै डोर्टमण्डलाई खेलमा फर्काएका थिए । त्यस्तै खेलको ८१ औं मिनेटमा भाज्क्वेजले गोल गर्दै टोलीको जित सुनिश्चित गरेका थिए ।

समूहको अर्को खेलमा टोटनह्यामले एपोएल निकोसियालाई ३-० ले पराजित गर्‍यो । टोटनह्याम समूह एचको विजेताको रुपमा छनोट भइसकेको हो भने रियल उपविजेताको रुपमा छनोट भएको हो ।

त्यस्तै इङ्ग्लिस टोली म्यानचेस्टर सिटीले सिजनको पहिलो हार बेहोरेको छ । शाख्तारले सिटीलाई २-१ ले हराउँदै अन्तिम १६ मा आफ्नो स्थान पक्का पनि गर्‍यो । यसैगरी फिलिप कौटिन्होको ह्याट्रिकको मद्दतले समूह ईमा लिभरपुलले स्पार्टाक मस्कोलाई ७-० ले हरायो ।

मेरिबोरसँग १-१ ले रोकिएको सिभिल्ला उपविजेता हुँदै छनोट हुन सफल भयो भने लिभरपुल विजेताका रुपमा छनोट भयो । समूह जीमा भने बेसिक्टास र पोर्टोले जित हांसिल गर्दै अन्तिम १६ मा स्थान बनाएका हुन् ।