म्यानचेस्टर (एजेन्सी) – प्रिमियर लिगको दोस्रो स्थानमा रहेको म्यानचेस्टर युनाइटेड आज सातौं स्थानमा रहेको बर्नलीको सामना गर्दै छ । युनाइटेडको घरेलु मैदान ओल्ड ट्राफोर्डमा खेलिने सो खेल नेपाली समयअनुसार रातिको ८.४५ बजे सुरु हुने छ ।
म्यानचेस्टर युनाइटेडका लागि डिफेन्डर क्रिस स्मलिङ घाइते भएका छन् । युनाइटेडका लागि एन्टोनियो भ्यालेन्सिया र एरिक बाई पनि घाइते नै छन् । डिफेन्डर मार्कोस रोहोले टोलीमा आगमन गर्ने देखिन्छ ।
बर्नलीका लागि पनि डिफेन्डर जेम्स टार्केवस्कि घाइते छन् । त्यस्तै अघिल्लो खेलमा मुख्य स्ट्राइकर क्रिस वुड पनि घाइते भएका थिए । बर्नलीले आफ्नो अघिल्लो खेलमा शनिबार टोटनह्यामसँग ३-० को पराजय भोगेको थियो ।
अर्को तर्फ युनाइटेड पनि लेस्टरसँग अन्तिम मिनेटमा गोल खाँदै बराबरीमा रोकिन पुग्यो । युनाइटेडले बर्नलीसँग आफ्ना पछिल्ला ५ खेलमा पराजय भोगेको छैन । घरेलु टोलीले आफ्नो सो लयलाई निरन्तरता दिन खोज्ने छ ।
