दिपक बोहोरा
पाँचथर– यो वर्ष अहिले सम्मको सबैभन्दा सफल टोली त्रिभुवन आर्मी क्लब नवौ रुस्लान फाल्गुनन्द गोल्ड कपको पहिलो खेलमै स्तब्ध भएको छ । मोरङ ११ सँग आज टाइब्रेकरमा ४–२ ले पराजित हुँदै आर्मी पहिलो खेलबाट फर्केको छ । मोरङ भने सेमिफाइनल पुगेको छ ।

अब मोरङ फाइनल प्रवेशका लागि शुक्रबार साविक विजेता विर्ता युनाइटेडको सामना गर्नेछ । अग्नी रुपन्देही ११ र सुनसरी ११ पनि यसअघि नै सेमिफाइनल पुगिसकेका छन् । निर्धारित ९० मिनेटको खेल १–१ को बराबरीमा टुंगिएपछि खेलको निर्णय टाइब्रकरमा भएको थियो ।

टाइब्रेकरमा मोरङका मिन धिमाल , बुद्धिमान राई , सुशिल राई र मिन्छेन तामाङले गोल गरे । आर्मीका एरिक बिष्ट र राजिब गुरुङ मात्र गोल गर्न सफल भए । राजन गुरुङको प्रहार पोष्ट बाहिर गयो भने सेसेहाङ लिम्बुको प्रहार बारमा लागेर फर्केको थियो ।

निर्धारित समयमा मोरङले खेलमा अग्रता लिएको थियो । सन्तोष न्यौपानेले ३५ औं मिनेटमा गोल गरेका थिए । उनले साइमन लिम्बुको क्रसमा गोल गरेका थिए । ५८ औं मिनेटमा आशिष शाक्यको गोलबाट आर्मी खेलमा फर्केको थियो । मोरङका सुरेन्द्र खवासले क्लियर गर्न नसकेको बलमा आशिषले गोल गरेका थिए ।

आर्मीले खेलमा पटक पटक अग्रता लिने अवसर गुमाएको थियो । १२ औं मिनेटमा अनिल कपुर थारु र ७२ औं मिनेटमा सेसेहाङ लिम्बुले गोल गर्न राम्रो चुकाए । मोरङका बुद्धिमानले पनि इन्जुरी समयमा गोलको अवसर पाएर पनि सदुपयो गर्न सकेनन् ।

मोरङका कप्तान सुरेन्द्र खवासले नतिजा आफ्नो पक्षमा परे पनि टोलीको प्रदर्शन सन्तोषजनक नरहेको बताए । मआमीृका प्रशिक्षक महेन्द्र खवासले फिदिम माविको मैदानमा टोलीको अनुभव कम भएकोले पनि खेल्न असहज भएको बताए । मोरङका सुशिल राई म्यान अफ दि म्यान अफ दि म्याच घोषित भए र उनले १० हजार रुपैयाँ प्राप्त गरे ।

आर्मीले यो वर्ष ३ वटा नकआउट उपाधि जितिसकेको छ । वैशाखमा वीरगन्जमा विशाल स्मृति गोल्ड कप जितेको आर्मीले गत महिना एक साताको फरकमा सताक्षी गोल्ड कप र मेची नेत्रालय काकरभिट्टा गोल्ड कपको उपाधि जितेको थियो । अर्को ए डिभिजन टोली लक्ष्मी हुन्डाई मनाङ मस्र्याङ्दी क्लबको नाममा भने यो वर्ष दुईवटा नकआउट उपाधि छन् ।

नवौं संस्करणको फाल्गुन्दको विजेताले उपाधि सहित ३ लाख र दोस्रो हुने टोलीले २ लाख रुपैयाँ प्राप्त गर्नेछ । म्यान अफ दि म्याच , उत्कृष्ट रक्षक , मिडफिल्डर , फरवार्डले समान १० हजार रुपैयाँ पाउनेछन् । सर्वोत्कृष्ट खेलाडीले मोटरसाइकल प्राप्त गर्नेछन् ।
फाल्गुनन्द गोल्ड कपमा बिहिकार पहिलो सेमिफाइनल
रुपन्देही ११ विरुद्ध सुनसरी ११