लमजुङ (हाम्रो खेलकुद) – लमजुङको सदरमुकाम बेसीशहरस्थित त्रिवेणी युवाक्लबको आयोजनामा २६ औं खुल्ला राष्ट्रव्यापी त्रिवेणी कप फुटबल प्रतियोगिता बिहिबारबाट सुरु भएको छ ।
जिल्लाकै ठुलो राशिको त्रिवेणी कपमा बिहीबार ४ खेल सम्पन्न भएका छन् । बेसीशहरको सहजी खेलमैदानमा सुरु भएको प्रतियोगिताको पहिलो खेलमा सुन्दरबजारले बेसीशहरको शेरालाई २–० ले पराजित गर्दै विजयी शुरुवात गरेको छ । यस्तै दोस्रो खेलमा अन्नपुर्ण युवा क्लब नाल्माले नवकालिका उदिपुरलाई ३–० ले पराजित गरेको छ ।
बिहिबार नै भएको तेस्रो खेलमा लमजुङ मर्स्याङ्दी युवा क्लब बेसीशहरले एमसिटी युथ क्लब बेशीसहरलाई सडन डेथमा ७–६ ले पराजित गर्दै अर्काे चरणमा प्रवेश गरेको छ । चौथौ तथा बिहिबारको अन्तिम खेलमा श्रीजंग गण उदिपुरलाई पेनाल्टी सुटआउटमा ४–३ ले पराजित गर्दै पारादेवी युवा क्लब दुवारले पनि विजयी सुरुवात गरेको छ । निर्धारित समयमा खेल १–१ गोलको बराबरीमा सकिएपछि खेल पेनाल्टी सुटआउमा पुगेको थियो ।
प्रतियोगितामा राष्ट्रिय स्तरका २३ टिमबीच प्रतिस्पर्धा हुने क्लबका अध्यक्ष छविन्द्रजङ गुरुङले बताए । विगतमा पहिलो पुरस्कार १ लाख ५० हजार रुपैयाँ भएकोमा गत वर्षको रजत जयन्तीसँगै उक्त राशीमा दोब्बर वृद्धि गरिएको छ ।
प्रतियोगितामा विजयी टोलीलाई नगद ३ लाख रुपैयाँ सहित त्रिवेणीकप, स्वर्णपदक र प्रमाणपत्र दिइनेछ भने उपविजेतालाई १ लाख ५० हजार सहित रजत पदक र प्रमाणपत्र प्रदान गरिने छ । सेमिफाइनलमा पराजित दुई समुहलाई पनि ५०-५० हजार नगद पुरस्कार दिइनेछ । त्यस्तै, सर्वाधिक गोलकर्ता र सर्वोत्कृष्ट खेलाडीलाई जनही १५ हजार र अनुशासित टिमलाई १० हजार सहित स्वर्णपदक र प्रमाणपत्र उपलब्ध गराइने क्लबका पुर्व अध्यक्ष कृष्णजङ गुरुङले बताए ।
