दिपक बोहोरा
पाँचथर– मोरङ ११ नवौं रुस्लान फाल्गुनन्द गोल्ड कप फुटबल प्रतियोगिताको फाइनलमा पुगेको छ । साविक विजेता झापाको विर्ता युनाइटेडलाई सडन डेथमा हराउँदै मोरङ उपाधि नजिक पुगेको हो । मोरङ ६–५ ले विजयी भएको थियो । आइतबार हुने फाइनलमा मोरङले सुनसरी ११ को सामना गर्नेछ । अघिल्लो दिन अग्नी रुपन्देही ११ लाई हराउँदै सुनसरी फाइनल पुगेको थियो ।

फिदिम माविमा आज भएको दोस्रो तथा अन्तिम सेमिफाइनलको निर्धारित समयमा १–१ को बराबरीपछि खेल टाइब्रेकरमा गएको थियो । टाइब्रेकरमा पनि ५–५ को बराबरीपछि सडन डेथमा खेलको निर्णय भएको थियो । सडन डेथमा मोरङका सुरेन्द्र खवासले गोल गरे । विर्ताका आशिष चापागाईको प्रहारलाई मोरङका गोलकिपर सूर्य अधिकारीले रोकेका थिए ।

पेनाल्टी सुटआउटमा मोरङका लागि अभिषेक लिम्बु,मिक्सेन तामाङ,बुद्धिमान राइ,अशोक खवास र मिन धिमालले गोल गरे । त्यस्तै विर्ताका लागि योगेश गुरुङ,सुमित मैनाली,दिलेन लोक्ताम,बिकि चौधरी र कर्ण लिम्बुले गोल गरे ।

खेलमा लिएको अग्रता जोगाउन नसक्दा उपाधि जोगाउने विर्ताको योजना असफल भएको छ । २४ औं मिनेटमा कर्ण लिम्बुको गोलबाट विर्ताले अग्रता लिएको थियो । योगेश गुरुङको पासमा कर्णले गोल गरेका थिए । खेल सकिन ९ मिनेट बाँकी रहँदा मोरङका अशोक खवासले गोल गर्दै खेलमा बराबरी पुर्याएका थिए ।

विर्ताले पटक पटक गोलको अवसर पाएर पनि गोल गर्न सकेन । झापाले पटक पटक पाएका अवसरहरु गुमाउदा पराजित हुन पुग्यो । २० औं मिनेटमा कर्णको प्रहारलाई गोलकिपर सूर्यले राके भने २८ औं मिनेट विशाल राईले मौका खेर फाले । ४२ औं मिनेटमा अर्को मौकामा पनि कर्ण चुके । ६४ औं मिनेटमा विशालको शसक्त प्रहारलाई सूर्यले छेकेका थिए भने ६८ औं मिनेटमा उनकै प्रहार पोष्टको केहि माथिबाट बाहिरिएको थियो । खेलको चौथो मिनेटमा मोरङका सन्तोष न्यौपानेले पनि मौका खेर फालेका थिए ।

विर्ताका प्रशिक्षक टेकराज तेलिङले सुरुवातमा लिएको अग्रता जोगाउन नसक्दा र पाएका अन्य अवसर सदुपयोग गर्न नसक्दा हारेको बताए । मोरङका प्रशिक्षक मनीष तिमल्सिनाले सामूहिक प्रदर्शनबाट टोलीलाई सफलता मिलेको बताए ।

म्यान अफ दी म्याच घोषित भएका मोरङका अशोक खवासले १० हजार रुपैयाँ प्राप्त गरे । फाल्गुनन्द गोल्ड कपको विजेताले उपाधि सहित ३ लाख, दोस्रो हुने टोलीले २ लाख रुपैयाँ प्राप्त गर्नेछन् । सवोत्कृष्ट खेलाडीले मोटरसाइकल प्राप्त गर्ने प्रतियोगिताका उत्कृष्ट गोलकिपर, रक्षक , मिडफिल्ड, फरवार्ड र प्रशिक्षकले समान १० हजार रुपैयाँ पाउनेछन् ।