म्याड्रिड (एजेन्सी)–स्ट्राइकर डिएगो कोस्टाले अन्ततः ला लिगा टाली एट्लेटिको म्याड्रिडमा पुनरागमन गरेका छन् । चेल्सीबाट उनी ६७ मिलियन पाउन्डमा एट्लेटिको फर्केका हुन् । पूर्व क्लबसँग उनले गएको सेप्टेम्बरमा नै सम्झौता गरेका थिए ।
चेल्सीका प्रशिक्षक एन्टोनियो कोन्टेसँग सम्बन्ध चिसिदै गएपछि उनीले त्यहाँ नफर्कने निर्णय लिएका थिए । आइतबार क्लबले उनलाई पत्रकार सम्मेलनमा प्रस्तुत गरेको थियो । कारवाहीमा परेका कारण एट्लेटिकोले पछिल्लो दुई वर्ष कुनै पनि खेलाडी अनुबन्धन गर्न पाएन ।
नियम वितपरित युवा खेलाडीसँग सम्झौता गरेको भन्दै क्लबमाथि कारवाही गरिएको थियो । तर, नयाँ वर्ष सन् २०१८ को सुरुआतमा कारवाही सकिदैछ । यसअघि कोस्टाले एट्लेटिकोबाट १ सय ३५ खेलमा ६४ गोल गरेका थिए ।
कोस्टाले २०१३/०१४ मा टोलीलाई ला लिगा उपाधि दिलाउन महत्वपूर्ण भूमिका निर्वाह गरेका थिए । त्यहि सिजन टोली च्याम्पियन्स लिगको फाइनल पुगेका थिए । २८ वर्षे कोस्टाले एट्लेटिकोमा १८ नम्बरको जर्सी लगाउनेछन् । कोपा डेल रेमा बुधबार हुने लिइडाविरुद्ध हुने खेलमा कोस्टाले दोस्रो पटक डेब्यू गर्ने सम्भावना छ ।
