वेष्ट ब्रोमविच (एजेन्सी) – गए राति प्रिमियर लिगमा आर्सनल वेष्ट ब्रोमसँग १-१ को बराबरीमा रोकिएको छ । सो खेल आर्सनलका प्रशिक्षक आर्सन वेंगरको कीर्तिमानी ८ सय ११ औं खेल पनि थियो ।
पहिलो हाफ खेल नियन्त्रणमा राखे पनि आर्सनलले अवसरहरु भने सिर्जना गर्न सकेको थिएन । खेलको दोस्रो हाफमा भने आर्सनलका एलेक्सिस सान्चेजले गरेको प्रहार वेष्ट ब्रोमका जेम्स मिक्लिनलाई लागेर आत्मघाती गोल हुन पुग्यो ।
तर आर्सनलको सो अग्रता धेरै बेर टिक्न सकेन । खेलको अन्तिम समयतिर जे रोड्रिगेजले घरेलु टोलीका लागि पेनाल्टीमार्फत गोल गर्दै आर्सनल र आर्सन वेंगरलाई निराश बनाए ।
सो खेल आर्सन वेंगरको ८ सय ११ औं खेल थियो जुन प्रिमियर लिगमा कुनै पनि प्रशिक्षकका लागि एउटा रेकर्ड पनि हो । यस भन्दा अघि म्यानचेस्टर युनाइटेडका पूर्व प्रशिक्षक सर एलेक्स फर्गुसनको नाममा ८ सय १० खेल थियो ।
यस नतिजासँगै आर्सनल तालिकाको पाँचौं स्थानमा यथावत् छ भने वेष्ट ब्रोम तालिकाको १९ औं स्थानमा रहेको छ ।
