धनगढी (हाम्रो खेलकुद) – यहि साता धनगढीमा सुरु हुने नेपाल आईस सुदूरपश्चिम खप्तड गोल्ड कप फुटबल प्रतियोगिताको तयारी अन्तिम चरणमा पुगेको आयोजक सुदूरपश्चिम ११ स्पोर्टस क्लबले जनाएको छ ।

क्लबले प्रतियोगिता सञ्चालनका लागि खेल मैदान सम्याउने, अतिरिक्त प्यारापिट निर्माण, टिकट व्यवस्थापन, खेलाडी लगायतको बसोवासको व्यवस्थापन लगायतका काम सकिन लागेको जनाएको छ । झण्डै एक महिनादेखि तयारीमा जुटेको आयोजक टोलीले विभिन्न समिति बनाएर काम थालिएको आयोजक क्लबका अध्यक्ष सुरेश हमालले बताए ।

धनगढी स्थित क्षेत्रीय खेलकुद रंगशालामा पुस २१ देखि सुरु भई माघ १ गते सम्म चल्ने प्रतियोगिताका लागि मैदानमा पानी राखेर रोलिङ गरिउको छ । मैदानलाई जति सक्दो राम्रो बनाउने प्रयास भइरहेको व्यवस्थापन समितिका संयोजक चक्र मल्लले जनाए । झण्डै ३ हजार ५ सय दर्शक क्षमताका दुई वटा प्याराफिट रहेको अवस्थामा फुटबलमा पहिलो पटक कृत्रिम प्याराफिट निर्माण गरिदैछ ।

झण्डै १५ सय दर्शक क्षमताको कृत्रिम प्याराफिट निर्माण भईरहेको छ । गत वर्ष धनगढी प्रिमियर लिगमा पोखरावाट कृत्रिम प्याराफिट ल्याएर बनाइएकोको थियो । फुटवलमा भने धनगढीकै स्किल नेपाल नामक कम्पनीले कृत्रिम प्याराफिट बनाइरहेको आयोजक क्लबका उपाध्यक्ष योगेन्द्र चन्द बताए ।

प्रतियोगितामा साविक विजेता मनाङ मस्र्याङ्दी, रुस्लान थ्री स्टार सिएमजी क्लब संकटा, त्रिभुवन आर्मी, झापा ११, साहारा क्लब पोखरा, अग्नी रुपन्देही ११, सुदूरपश्चिम ११, धरान फुटबल क्लब, एपिएफ क्लब, काठमाडौं, डुक स्टार क्लब भुटान, च्यासल युथ क्लब गरि १२ टोली छन् ।

सहभागी टोलीहरुलाई दुई समुहमा विभाजन गरेर खेल तालिका पनि यसअघि नै सार्वजनिक भइसकेको छ । प्रतियोगिताको उद्घाटन खेलमा शुक्रबार आयोजक सुदुरपश्चिम ११ स्पोर्टस क्लव र काठमाण्डौको च्यासल युथ क्लवबीच प्रतिस्पर्धा हुने प्रतियोगिताका प्रवक्ता ओम चन्दले बताए ।

मोफसलको सर्वाधिक पुरस्कार राशी रहेको दोस्रो संस्करणको खप्तड गोल्ड कपको विजेताले उपाधिसहित ११ लाख ११ हजार १ सय ११ र दोस्रो हुने टोलीले ५ लाख ५५हजार ५ सय ५५ रुपैयाँ प्राप्त गर्नेछ ।

सर्वोत्कृष्ट खेलाडीले मोटरसाइल पाउने प्रतियोगितामा अलग अलग विधाका उत्कृष्टले समान १५ हजार रुपैयाँ पाउनेछन् । हरेक खेलको म्यान अफ दी म्याचले १० हजार रुपैयाँ पाउनेछन ।

सिजी ग्रुपको नेपाल आइस ब्रान्ड मुख्य प्रायोजक र नेपाल टेलिकम सह प्रयोजक रहने प्रतियोगितामा टिकट काटेर खेल हेर्न जाने दर्शक मध्येबाट हरेक दिन गोल प्रथाका आधारमा छानिने एक जना विजेताले मोबाइल पाउनेछन् ।