लन्डन (एजेन्सी)– टोटेनह्यामका पूर्व स्टार एलान मलेरीको नजरमा ह्यारी केन अहिले विश्वका उत्कृष्ट खेलाडी हुन् र उनको मुल्य ३ सय मिलियन पाउन्ड रहेको बताएका छन् । सन् २०१७ मा केन युरोपका सर्वाधिक गोलकर्ता हुन् ।

उनले बार्सिलोनाका लियोनल मेस्सी र रियल म्याड्रिडका क्रिस्टियानो रोनाल्डोलाई समेत पछि पारेका थिए । केनले क्लब र इङ्ल्यान्डका लागि गरि गत वर्ष ५६ गोल गरेका थिए । जसमा दुई लगातार ह्याट्रिक थिए । चलिरहेको ट्रान्सफर सिजनका भर्जिल भान डाइक हालै ७५ मिलियन पाउन्डमा लिभरपुल पुगेका थिए । त्यसै सम्बन्धी प्रतिक्रिया दिँदै मलेरीले केन ३ सय मिलियन पाउन्डको हकदार रहेको बताउँछन् ।

‘सहि समयमा गोल गर्ने उनीमा विजोड क्षमता छ । अहिले भर्जिल ७५ मिलयनमा बिक्री हुन्छन् भने केनको मुल्य कति होला,’ मुलेरेले भने, ‘यदि त्यो रकममा दोब्बर भन्ने हो भने १ सय ५० मिलियन पाउन्ड हुन्छ । तर त्यसलाई बिर्सनुहोस् । त्यो उनका लागि आधा मुल्य मात्र हुनेछ । उनी अहिले युरोपका शीर्ष खेलाडी हुन् ।’

केनमाथि स्पेनिस महारथी रियलले चासो देखाइरहेको छ । तर, इङ्लिस टोलीका सदस्य केन अहिले टोटेनह्याममै खुसी रहेको बताइन्छ । अर्को सिजन टोलीलाई च्याम्पियन्स लिगमा छनोट गराउन केनको भूमिका कस्तो रहन्छ त्यो भने धेरैको चासोमा रहेको छ ।