म्यानचेस्टर (एजेन्सी) – प्रिमियर लिगको शीर्ष स्थानमा रहेको म्यानचेस्टर सिटी आज वाटफोर्डसँग भिड्दै छ । सिटीको घरेलु मैदान एटिहाडमा खेलिने सो खेल नेपाली समयअनुसार रातिको १.४५ बजे सुरु हुने छ ।

१८ खेल लगातार जितेको म्यानचेस्टर सिटीले पछिल्लो खेल क्रिस्टल प्यालेससँग गोलरहित बराबरी खेलेको थियो । त्यस्तै सिजनमा राम्रो सुरुवात गरेको वाटफोर्ड अहिले खराब लयमा रहेको छ ।

प्यालेससँगको बराबरीमा सिटीका मुख्य खेलाडि केभिन डे ब्रुयन घाइते भएका थिए । त्यस्तै ग्याब्रियल जेसस पनि सोहि खेलमा घाइते हुँदै कम्तीमा एक महिनाको लागि बाहिर भएका छन् । डेभिड सिल्भा व्यक्तिगत कारणले खेलमा सहभागी हुने छैनन् ।

अर्को तर्फ वाटफोर्डका लागि पनि थुप्रै खेलाडिहरु घाइते छन् र क्लबका कप्तान ट्रोय डिनी प्रतिबन्धित छन् । वाटफोर्ड २५ अंकका साथ तालिकाको १० औं स्थानमा छ भने सिटीको २१ खेलमा ५९ अंक छ । दोस्रोमा रहेको म्यानचेस्टर युनाइटेडभन्दा सिटी १२ अंकले अगाडि रहेको छ ।

त्यस्तै आजको अन्य खेलमा टोटनह्याम र स्वान्सी १.३० बजे भिड्दै छन् । टोटनह्यामका लागि आज ह्यारी केन खेल्ने निश्चित छैन । त्यस्तै सोहि समयमा वेष्ट ह्याम वेष्ट ब्रोमको सामना गर्दै छ भने साउथह्याम्पटन क्रिस्टल प्यालेससँग भिड्दै छ ।