म्यानचेस्टर (एजेन्सी) – गए राति प्रिमियर लिगमा शीर्ष स्थानमा रहेको म्यानचेस्टर सिटीले वाटफोर्डमाथि ३-१ को जित दर्ता गरेको छ । सिटीको जितमा रहिम स्टेर्लिङले सिजनकै छिटो गोल पनि गरेका थिए ।
स्टेर्लिङले खेल सुरु भएको ३८ सेकेन्डमै गोल गर्दै घरेलु टोलीको खाता खोलेका थिए । त्यस्तै वाटफोर्डको डिफेन्डर क्रिस्टियन काबासेलिले १३ औं मिनेटमा आत्मघाती गोल गर्दा सिटीले आफ्नो अग्रता दोब्बर बनायो ।
खेलको ६३ औं मिनेटमा स्ट्राइकर सर्जियो अगुएरोले थप एक गोल गरे भने ८२ औं मिनेटमा वाटफोर्डका स्ट्राइकर आन्द्रे ग्रेले एक सान्तवना गोल फर्काए । यस जितसँगै सिटी तालिकाको अग्रस्थानमा १५ अंकले अगाडि रहेको छ ।
त्यस्तै अर्को खेलमा बलियो टोली टोटनह्यामले स्वान्सीलाई २-० ले हराउन सफल भयो । ह्यारी केनबिना मैदानमा उत्रेको टोटनह्यामका लागि फर्नान्डो लोरेन्टे र डेले अल्लीले गोल गरे ।
त्यस्तै अन्य खेलमा एन्डि कारोलको दुई गोलमा वेष्ट ह्याम वेष्ट ब्रोमसँग २१ ले विजयी भयो भने क्रिस्टल प्यालेसले साउथह्याम्पटनलाई २-१ ले हराउन सफल भयो ।
