लमजुङ (हाम्रो खेलकुद)– बेसीशहर युथ सोसाइटीले २६ औं त्रिवेणी कप फुटबल प्रतियोगिताको उपाधि जितेको हो । आयोजक त्रिवेणी युवा क्लबलाई पेनाल्टी सुटआउटमा ३–२ ले पराजित गर्दै बेसीशहर च्याम्पियन बनेको हो । बेशीशहरले तीन वर्षको अन्तरमा दोस्रोपटक उपाधि जित्न सफल भएको हो ।
लमजुङ सदरमुकाम बेसीशहरस्थित सहज खेल मैदानमा बुधबार भएको फाइनल खेलमा प्रतिस्पर्धात्मक बनेको खेलमा निर्धारित र थप गरिएको समयमा गोल भएन । त्यसपछि निर्णयका लागि खेल टाइब्रेकरमा गएको थियो । उपाधिसँगै बेसीशहरले ३ लाख रुपैयाँ र दोस्रो टोलीले १ लाख ५० हजार रुपैयाँ प्राप्त गर्यो ।
सेमिफाइनलमा पराजित दुई टोली सुन्दर बजार र घनपोखराले समान ५० हजार रुपैयाँ प्राप्त गरे । अन्नपूर्ण युवा क्लब नाल्मा प्रतियोगिताको अनुसाशित टोली घोषित हुँदै १० हजार प्राप्त गर्यो । सुन्दरबजारका इन्द्र पुरा, सामाना युवा क्लबका सन्त बहादुर गुरुङ र रड्स फुटबल क्लब चितवनका सावि गुरुङ सर्वाधिक गोलकर्ता रहे । दुवैले समान ५ हजार प्राप्त गरे ।
त्रिवेणी युवा क्लबका गोलकिपर आकाश रानाभाट सर्वोत्कृष्ट खेलाडी घोषित भए र उनले १५ हजार रुपैयाँ प्राप्त गरे । बेसीशहरका विमल थापा उत्कृष्ट गोलकिपर घोषित भए । विजेता, उपविजेता टोलीका खेलाडीलाई लमजुङ जिल्ला न्यायधीश कोमल प्रसाद आचार्यले पुरस्कृत गरे ।
सेमिफाइनलमा आयोजक त्रिवेणी युवा क्लबले सुन्दरबजारलाई सडनडेथमा ७–६ ले तथा अर्को सेमिफाइनलमा बेशीशहर युथ सोसाइटीले घनपोखरा युथ क्लबलाई सडन डेथमै १२–११ ले पराजित गर्दै फाइनलमा प्रवेश गरेको थियो । पुस १२ गतेबाट शुरु भएको प्रतियोगितामा राष्ट्रियस्तरका २३ टोलीको सहभागिता थियो ।
टिमले सहभागिता रहेको थियो ।
