म्याड्रिड (एजेन्सी) – स्पेनिस कोपा डेल रेमा रियल म्याड्रिडले नुमान्सियालाई ३-० को अन्तरले हराएको छ । अर्को तर्फ बार्सिलोना भने सेल्टा भिगोसँग पहिलो लेगमा १-१ को बराबरीमा रोकियो ।
रियल म्याड्रिडले ३५ औं मिनेटमा ग्यारेथ बेलको पेनाल्टीमार्फत खेलमा अग्रता लिएको थियो । त्यस्तै खेलको अन्तिम समयतिर रियलले थप दुई गोल गर्न सफल भयो ।
८९ औं मिनेटमा इस्कोले पेनाल्टीमार्फत गोल गरे भने ९० औं मिनेटमा भ्रमणकारी टोलीका लागि बोर्या मायोरलले गोल गर्दै जित सुनिश्चित गरे ।
अर्को तर्फ सेल्टा भिगोको घरेलु मैदानमा बार्सिलोना १-१ को बराबरीमा रोकिन पुग्यो । बार्साका लागि जोसे अर्नाइजले गोल गर्दै टोलीलाई खेलको १५ औं मिनेटमा अग्रता दिलाए । तर सेल्टा भिगोका पियोने सिस्टोले ३१ औं मिनेटमा गोल फर्काउँदै खेल बराबरी पारे ।
बार्सिलोनाले स्टार खेलाडि लियोनल मेस्सी र लुइस स्वारेजलाई विश्राम दिएको थियो । रियलले आफ्नो दोस्रो लेग जनवरी ११ तथा बार्सिलोनाले आफ्नो दोस्रो लेग जनवरी १२ मा आ-आफ्नै घरेलु मैदानमा खेल्ने छन् ।
