पेरिस (एजेन्सी) – ब्राजिलियन फुटबलका महान खेलाडी रिभाल्डोले पेरिस सेन्ट जर्मेन (पिएसजी) का नेयमारलाई विश्वको उत्कृष्ट खेलाडी बन्न च्याम्पियन्स लिगमा क्रिस्टियानो रोनाल्डो र उनको टोली रियल म्याड्रिडलाई हराउनु पर्ने बताएका छन् ।
बार्सिलोनामा ५ वर्ष बिताएका रिभाल्डोले नेयमारले आफुलाई विश्वको उत्कृष्ट खेलाडी प्रमाणित गर्न बार्सिलोना छाडेको धारणा राखेका छन् ।
‘नेयमारले जति राम्रो खेलेपनि बार्सिलोनामा उनी लियोनल मेस्सीको छायाँमा परेका थिए’, उनले भने, ‘मेस्सी उत्कृष्ट खेलाडी हुन् । नेयमारले अझ धेरै समय खेल्न बाँकी छ । उनले आफुलाई विश्वको उत्कृष्ट खेलाडी प्रमाणित गर्न बार्सिलोना छाडेका हुन् ।’
रिभाल्डोले थपे, यदि उनलाई विश्वको उत्कृष्ट खेलाडी बन्नु छ भने रोनाल्डो सम्मिलित रियललाई च्याम्पियन्स लिगमा हराउन जरुरी छ । पिएसजीले च्याम्पियन्स लिगको अन्तिम १६ मा रियलको सामना गर्दैछ ।
