दिपक बोहोरा
इटहरी – मोफसलमा सर्वाधिक पुरस्का राशीको गोल्ड कप आयोजनामा प्रतिस्पर्धा नै चलेको छ । विभिन्न शहरमा एकपछि अर्को प्रतियोगिता आयोजना भइरहेका गोल्ड कपमा पछिल्लो पटक मदन भण्डारी स्मृति इटहरी गोल्ड कप फुटबल प्रतियोगिता सर्वाधिक पुरस्कार राशीको रुपमा रहेको छ ।

मोफसलका अधिकांश प्रतियोगिताको विजेताले ५ लाख रुपैयाँ पाउने सामान्य जस्तै भइसकेका छन् । त्यस्तोमा मेची नेत्रालय काकरभिट्टा गोल्ड कपका लागि विजेताले ८ लाख रुपैयाँ घोषणा गरियो । तर, अहिले धनगढीमा जारी नेपाल आइस सुदूरपश्चिम खप्तड गोल्ड कपले सर्वाधिक पुरस्कार राशी भन्दै ११ लाख ११ हजार १ सय ११ रुपैयाँ पुरस्कार घोषणा गरेको छ । पछिल्लो पटक यो नै सर्वाधिक पुरस्कार राशी थियो ।

अर्को हप्ता इटहरीमा सुरु हुने इटारी गोल्ड कपमा सर्वाधिक पुरस्कार राशीका रुपमा १२ लाख रुपैयाँ घोषणा गरिएको छ । माघ ६ गते रुस्लान थ्री स्टार क्लब र नेपाल एपिएफ क्लबबीचको प्रतिस्पर्धासँगै इटहरी गोल्ड कप सुरु हुनेछ । प्रतियोगिता इटहरी रंगशालामा माघ १३ गते सम्म हुनेछ ।
राष्ट्रिय जागृती क्लब इटहरीको आयोजनामा हुने प्रतियोगितालाई सुनसरी जिल्ला फुटबल संघले सहयोग गरेको छ भने संयोजकन इटहरी उप महानगरपालिका र मदन भण्डारी स्मृति प्रतिष्ठान गरेको छ । प्रतियोगितामा ८ टोलीको सहभागिता रहेको छ ।

थ्री स्टार र एपिएफ रहेको समूहमा भुटानको ड्रुक यनाइटेड एफसी र त्रिभुवन आर्मी क्लब रहेका छन् । अर्को समूहमा लक्ष्मी हुन्डाई मनाङ मस्र्याङ्दी र रमपम झापा ११, आयोजक टोली र भारत कोलकाताको गरिफा स्पोर्टिङ क्लब छन् ।