सबिन शेर्मा
झापा – नेपाल पुलिस क्लब तेस्रो रमपम झापा गोल्डकप फुटबल प्रतियोगिताको क्वार्टरफाइनलमा पुगेको छ । डोमालाल राजवंशी रंगशालामा आइतबार अग्नी रुपन्देही ११ लाई १–० ले हराउँदै पुलिस अन्तिम आठमा पुगेको छ ।

रजिन सुब्बाले ८२ औं मिनेटमा गरेको गोल खेलको निर्णायक बनेको थियो । पुलिसका सुमन लामा खेलको म्यान अफ दी घोषित भएका थिए । सुमनले २५ हजार रुपैयाँ प्राप्त गरे । अब पुलिसले क्वार्टरफाइनलमा अर्को विभागिय टोली त्रिभुवन आर्मी क्लबको सामना गर्नेछ ।

पुलिस र आर्मी दुई विभागिय टोलीले यो वर्ष ८ वटा नकआउट फुटबल प्रतियोगिताको उपाधि जितिसकेका छन् । आर्मीले सबैभन्दा बढी ६ उपाधि जित्दा पुलिसले २ उपाधि जितेको छ । पुलिससँगै लक्ष्मी हुन्डाई मनाङ मस्र्याङ्दी र रुस्लान थ्री स्टार क्लबले पनि समान २ वटा उपाधि जितेका छन् ।

राखेप च्याम्पियनसिपको फुटबलमा स्वर्ण जितेको पुलिसले यसपटक आहा रारा गोल्डकप फुटबल प्रतियोगिताको उपाधि जितेको थियो । प्रतियोगिताको पहिलो दिन शनिबार आयोजक झापा ११ विजयी भएको थियो ।

झापा गोल्डकप आयोजक समितिले सञ्चालन गरेको प्रतियोगिताको विजेताले १२ लाख ५१ हजार तथा दोस्रो हुने टोलीले ६ लाख रुपैयाँ प्राप्त गर्नेछ । यो मोसफलको नकआउट फुटबल प्रतियोगिताको सर्वाधिक पुरस्कार राशी हो ।