अध्ययन भन्छ, स्पेनले विश्व कप जित्नेछ

रुस (एजेन्सी) – सिआईइएस फुटबल अब्जरभेटरीले गरेको अध्ययन अनुसार स्पेनले रुस २०१८ विश्व कप जित्ने प्रवल सम्भावना छ, स्पेनिस मिडिया मार्साले जनाएको छ।

सन् २०१० को विजेता स्पेलाई यस पटक बलियो दाबेदारको रुपमा हेरिएको छ। यसअघि २०१० विश्व कपमा फाइनलमा डचलाई १-० ले पराजित गर्दै स्पेनले फाइनल जितेको थियो। नेदरल्याण्डस भने यस विश्व कपमा छनोट हुन सकेन।

क्लबसँग कुन खेलाडीले कति खेल समय पाएको र खेलाडी कस्तो स्तरको लिगमा खेल्दैछ, इत्यादी तथ्याङ्कको आधारमा तयार पारेको रिपोर्टले स्पेनलाई बलियो दाबेदारको रुपमा प्रस्तुत गरेको हो।

सिआईइएसको तथ्याङ्क अनुसार १ देखि १ सयकोबीचमा दिइएको रेटिङ्गमा स्पेनले १ सय अंक प्राप्त गरेको छ। त्यस्तै दोस्रो सम्भावना ब्राजिलको रहेको छ। ब्राजिलले ८९ अंक तथा फ्रान्सले ८४ अंक प्राप्त गरेको छ। त्यसपछि जर्मनीको ८२ र पाँचौ स्थानमा इङ्ल्याण्डको ७२ अंक छ। त्यस्तै मेस्सीको अर्जेन्टिना भने बेल्जियम पछि सातौँ स्थानमा छ।अर्जेन्टिनालाई सिआईइएसले ६९ अंक दिएको छ।

सोही रेटिङ्ग अनुसार विश्व कप जित्ने कम मौका भने पानामाको छ। पानामाको १२ अंक छ भने साउदी अरबियाको २१ र इरानको २३ अंक छ। पानामाको लिग कमजोर भएको कारण थोरै अंक प्राप्त गरेको अध्ययनमा लेखिएको छ।