रोस्टोभ (एजेन्सी) – रसियामा जारी विश्व कपको बेल्जियम र जापानबीच छैटौं प्रिक्वार्टरफाइनलको पहिलो हाफ गोलरहित बराबरीमा टुंगिएको छ । यो खेलको विजेताले क्वार्टरफाइनलमा ब्राजिलको सामना गर्नेछ । ब्राजिलले आजै मेक्सिकोलाई २–० ले हराएको थियो ।

विश्वकप फुटबलको नकआउट चरणमा पुग्ने एक्लो एसियाली राष्ट्रका रुपमा रहेको जापानले पटक पटक दबाब खेप्दा पनि स्तरिय बेल्जियमलाई ४५ मिनेट रोक्न सफल भएको छ । जापान समूह ‘एच’ बाट फेयर प्लेमार्फत सेनेगललाई पछि पार्दै अन्तिम १६ मा पुग्न सफल टोली हो ।

लगातार छैटौंपटक विश्वकप खेलिरहेको जापानको २००२ र २०१० को विश्वकपमा अन्तिम १६ मा पुग्नु नै ठुलो सफलता हो । जापान अहिले सम्म विश्व कपको क्वार्टरफाइनल पुग्न सकेको छैन । आफ्नो समूहको विजेताका रुपमा अघि बढेको बेल्जियम २२ खेलसम्म अपराजित रहेको छ ।

सन् १९८६ को विश्वकपमा चौथो स्थान हात पार्नु नै बेल्जियमको ठुलो उपलब्धि हो । त्यसयता चारवर्ष अघिको विश्वकपमा बेल्जियमले अन्तिम आठमा स्थान बनाएको थियो ।यी दुई टोलीबीच यसअघिका पाँच खेलमा जापानले दुई खेलमा जित, २ बराबरी र १ खेलमा हार बेहोरेको थियो ।

यी टोलीले  २००२ को विश्वकपको समूह चरणमा २–२ गोलको बराबरी खेलेका थिए । २०१७ को मैत्रीपूर्ण खेलमा बेल्जियम १–० ले विजयी भएको थियो ।