काठमाडौं (हाम्रो खेलकुद)– साफ च्याम्पियनसिपमा चुनौति पेश गर्न नेपाली फुटबल टोली आइतबार बंगलादेश यात्रामा निस्कदैछ । दक्षिण एसियाली राष्ट्रबीचको सबैभन्दा प्रतिष्ठित फुटबल प्रतियोगितामा यसपटक नेपालको प्रदर्शन कस्तो रहला समर्थकहरुको चासो रहेको छ ।

प्रतियोगिता सुरु हुन अब तीन दिन मात्र बाँकी छ । बुधबार पाकिस्तानसँग खेल्दै नेपालले यात्रा प्रारम्भ गरेका छ । अहिले सम्म सेमिफाइलभन्दा अघि बढ्न नसकेको नेपालको यसपटको पहिलो लक्ष्य नकआउट चरण प्रवेश नै रहेको छ । पाकिस्तानपछि भुटान र बंगलादेशसँगको नतिजा पनि नेपालको अघिल्लो चरणे यात्राको समिकरण थाहा हुनेछ ।

नेपाल टोलीले इन्डोनेसियामा जारी एसियाली खेलकुद र साफ च्याम्पियनसिपको लागि तीन महिना अघिबाटै प्रशिक्षण सुरु गरेको थियो । यू–२३ टोली एसियाडमा तीन खेल गुमाएर फर्के लगत्तै प्रशिक्षणलाई निरन्तरता दिएका छन् । टिमलाई कार्यवहाक मुख्य प्रशिक्षक बालगोपाल महर्जन सहायक प्रशिक्षक किरण श्रेष्ठ र नवीन महर्जनले प्रशिक्षण दिइरहेका छन् ।

सन् १९९३ मा सार्क गोल्डकपका नामले शुरु भएको यो प्रतियोगिता १९९७ मा नेपालमा आयोजना भएपछि साफ च्याम्पियनसिप बन्न पुगेको थियो । त्यसयता यो प्रतियोगिता साफ गोल्डकप, साफ कोकाकोला गोल्डकप हुदै साफ सुजुकी कपको नामले पनि चिनिन्छ । साफमा नेपालको इतिहास सन्तोषजक छैन । सेमिफाइनल भन्दा अघि बढ्न नसकेको नेपालले पटक पटक समूह चरणबाटै निराश भएर फर्कन परेको थियो ।

पाँचौ साफ गोल्डकप : नेपाल समूह चरणबाट बाहिर 

पाँचौ संस्करणको साफ गोल्डकप दुई वर्ष ढिला गरी बंगलादेशमा सन् २००३ को जनवरी १० देखि २० जनवरीसम्म आयोजना भयो । हरेक दुई वर्षमा आयोजना हुने तालिका अनुसार २००१ मा पाँचौ संस्करण आयोजना हुनुपर्ने थियो । यही संस्करणबाट साफ गोल्डकपमा ८ राष्ट्रको सहभागिता रह्यो । अफगानिस्तान र भुटानले साफ गोल्डकपमा पहिलोपटक सहभागिता जनाए ।

पाँचौ संस्करणमा पनि नेपालको प्रदर्शन सन्तोषजनक रहेन । समूह ‘बी’ रहेको नेपाल दुई हार र एकजितसहित तेस्रो स्थानमा रहँदै प्रतियोगिताको समूह चरणबाट बाहिरियो । नेपाल पहिलो खेलमा आयोजक बंगलादेशसँग १–० ले निराश बन्यो । दोस्रो खेलमा भुटानलाई २–० ले पराजित गर्दै नेपालले अघिल्लो चरण प्रवेश गर्ने सम्भावना बलियो बनाएको थियो ।

यो खेलमा निराजन रायमाझी र कुमार थापाले गोल गरेका थिए । समूह चरणको अन्तिम खेलमा माल्दिभ्ससँगको खेलमा अग्रता लिएर पनि जोगाउन नसक्दा नेपाल ३–२ ले पराजित हुदै समूह चरण पार गर्न सकेन । ५६औं मिनेटमा निराजन रायमाझीको गोलबाट नेपालले खेलमा अग्रता बनाएको थियो । तर, नेपालले त्यो अग्रता बचाउन सकेन । नेपालले ६३, ७५ र ८५औं मिनेटमा गोल खाएपछि खेलमा ३–१ ले पछि परेको थियो । ९०औैं मिनेटमा देवनारयाण चौधरी पेनाल्टीमा गोल गरेपनि खेलमा फर्कन निकै ढिला भैसकेको थियो ।

यो संस्करणमा आयोजक बंगलादेश नै च्याम्पियन बन्न सफल भयो । समुह चरणमा १–० को कठिन जित निकालेको बंगलादेशले फाइनलमा माल्दिभ्सलाई पेनाल्टी सुटआउटमा ५–३ ले पराजित गर्दै पहिलोपटक साफ गोल्डकप च्याम्पियन बन्न सफल भयो । दुवै टिमले निर्धारित र थप गरिएको समयमा १–१ गोलको बराबरी खेलेको थियो ।
छैटौ साफ गोल्डकप : नेपाल लगातार समूह चरणबाट बाहिर
छैटौ साफको आयोजना फेरि पाकिस्तानमा फर्कियो । यसअघि पाकिस्तानले पहिलो साफ गोल्डकप आयोजना गरेको थियो । गोल्डकप पाकिस्तानमा २००५ डिसेम्बर ७ देखि १७ सम्म आयोजना भयो । दक्षिण एसियामा आफुलाई फुटबलको शक्तिशाली राष्ट्रको रुपमा उभ्याएको भारत यो संस्करणको च्याम्पियन बन्न सफल भयो । साफ गोल्डकपमा भारत चौथोपटक च्याम्पियन बन्न सफल भयो ।

समूह चरणमा १–१ गोलको बराबरी खेलेपनि फाइनलमा भारत २–० को जित निकाल्न सफल भयो । यो संस्करणमा माल्दिभ्सका इभ्राहिम फाजिल, अलि अस्फाक र अहमेद थारिक समान ३ गोलसहित संयुक्त रुपमा सर्वाधिक गोलकर्ता बने । यो संस्करणमा पनि नेपालले समूह चरण पार गर्न सकेन ।

समूह ‘बी’ रहेको नेपालले समुह चरणमा भुटानलाई पराजित गर्नुबाहेक बंगलादेश र भारतसँग पराजित हुदै समूह चरण पार गर्न सकेन । नेपाल पहिलो खेलमा बंगलादेशसँग २–० ले तथा दोस्रो खेलमा भारतसँग २–१ ले पराजित भयो । भारतविरुद्धको खेलमा बसन्त थापाले गोल गरेका थिए । समुह चरणको अन्तिम खेलमा भुटानमाथि ३–१ को जित निकाल्दा सुरेन्द्र तामाङ, बसन्त थापा र विजय गुरुङले गोल गरेका थिए ।