प्रकाश तिमल्सिना
ढाका – यस पटकको ढाका यात्रा नेपाली फुटबल टोलीका लागि कस्तो रहला ? नेपाल फुटबल समर्थकका लागि सबैभन्दा चासोको विषय हो । नेपाल साफ च्याम्पियनसिपको उपाधि जितेर स्वदेश फर्कला वा फेरि निराश भएर फर्कनुपर्ला । अपेक्षा बढी र कमजोर प्रदर्शन साफ च्याम्पियनसिपमा नेपाली टोलीको नियती जस्तै बनेको छ ।

ढाकामा सोमबार अभ्यास गर्दै नेपाली टोली । तस्बिर: एन्फा

सन् २०११ र २०१३ को साफ च्याम्पियनसिपमा लगातार सेमिफाइनल पुग्नुबाहेक नेपाली टोलीको साफ च्याम्पियन इतिहास कमजोर नै छ, अझ भनौं बिर्सन लायक छ । ढाकामा आजबाट सुरु हुने १२ औं संस्करणमा फेरि एक पटक नेपाली टोलीबाट उच्च अपेक्षा गरिएको छ । हरेक प्रतियोगिताको पहिलो खेल महत्वपूर्ण हुने प्रशिक्षकहरुले बताउने गरेका छन् । त्यो भनाईलाइ मान्दा आज पाकिस्तानसँग हुने उद्घाटन खेल नेपालका लागि महत्वपूर्ण हुनेछ ।

नेपाल र पाकिस्तानबीचको खेल नेपाली समय अनुसार खेल ३ः४५ बजे सुरु हुनेछ । पहिलो खेल जित्न सके अघिल्लो चरण यात्राको सम्भावना बलियो हुनेछ । आजको खेल बराबरी वा गुमाएमा टोलीमाथि बाँकी दुई खेलमा दबाब पर्नेछ । नेपालले दोस्रो खेल बिहीबार भुटान र शनिबार आयोजक बंगलादेशसँग खेल्ने छ । अहिले फाइनल सम्मको बारेमा सोच्न हतारो हुने बुझेका टोलीका कार्यवहाक मुख्य प्रशिक्षक बालगोपाल महर्जनले पहिलो लक्ष्य सेमिफाइनल रहेको बताउँदै आएका छन् ।

उनले सोमबारको प्रिम्याच कन्फ्रेन्समा पनि त्यहि भनाई दोहोराएका छन् । पहिलो सेमिफाइनल पुग्ने हाम्रो लक्ष्य हो, उनले भनेका थिए, हाम्रो लक्ष्य पक्कै पनि च्याम्पियन बन्ने हो । सेमिफाइनल पुगेपछि मात्र हामीले फाइनलको पुग्ने बारेमा सोच्ने छौं । नेपाल र पाकिस्तानको खेलपछि आजै आयोजक बंगलादेश र भुटानबीच प्रतिस्पर्धा हुनेछ । अर्को समूहमा साफ च्याम्पियनसिपको सर्वाधिक सफल टोली भारत, माल्दिभ्स र श्रीलंका छन् । राउन्ड रोविन लिगपछि समूहका शीर्ष २ टोली सेमिफाइनल पुग्नेछन् ।

अहिले साफ सुजिकी कपका नाममा हुने प्रतियोगिता यसअघि साफ च्याम्पियनसिप र सुरुवातमा सार्क गोल्ड कपका नाममा आयोजना भएको थियो । २६ वर्ष लामो इतिहास बोकेको प्रतियोगिता १९९३ र १९९५ सार्क गोल्ड कप र १९९७ पछि साफ च्याम्पियनसिपका नाममा आयोजना हुँदै आएको छ ।

साफ च्याम्पियनसिपमा नेपालको प्रदर्शन

पाकिस्तान (१९९३) – तेस्रो स्थान (सार्क गोल्डकप)

श्रीलंका (१९९५) – चौथो स्थान (सार्क गोल्डकप)

नेपाल (१९९७) – समूह चरण भारत (१९९९) – चौथो स्थान

बंगलादेश (२००३) – समूह चरण

पाकिस्तान (२००५) – समूह चरण

माल्दिभ्स÷श्रीलंका (२००८) –समूह चरण

बंगलादेश (२००९) – समूह चरण

भारत (२०११) – सेमिफाइनल

नेपाल (२०१३) – सेमिफाइनल

भारत (२०१५) – समूह चरण

साफ च्याम्पियनसिपमा नेपालको खेल सङ्ख्या – २८ जित– ८ हार– १६ बराबर–४  गोल अन्तर  ३३–४५

सार्क गोल्डकपमा नेपालको प्रदर्शन खेल– ६ जित–१ बराबरी–२ हार– ३ गोल अन्तर ४–६