काठमाडौं (हाम्रो खेलकुद) – पल्सर सहिद स्मारक ए डिभिजन लिग अन्तर्गत शनिबार हल्चोकस्थित एपीएफ रंगशालामा दुई खेल हुँदैछन् । पहिलो खेलमा सीएमजी क्लब संकटा र भ्याली च्यासल युवा क्लब खेल्दैछन् । दोस्रो खेलमा शीर्षस्थानको मनाङले सरस्वतीको सामना गर्नेछ ।

संकटाले लिगमा लगातार तीन खेल जितेपछि पछिल्लो खेलमा आर्मीसँग ५-१ को फराकिलो हार बेहोरेको थियो । यता च्यासल पनि उतारचढावको प्रदर्शनले समस्यामा छ । पछिल्लो खेलमा आफ्नै गल्तीका कारण पुलिसलाई दुई गोल उपहार दिएपछि च्यासल २-० ले पराजित भएको थियो । त्यसअघि भने च्यासलले एनआरटीलाई ५-१ को फराकिलो अन्तरले पराजित गरेको थियो ।

संकटाले ४ खेलमा ९ अंक जोडेको छ भने च्यासल ४ अंकमा नै सिमित छ । च्यासलले आर्मी र पुलिससँग हार बेहोरेको छ भने मछिन्द्रसँग गोलरहित बराबरी खेलेको थियो । संकटाले भने पहिलो खेलमा सरस्वती, दोस्रोमा जावलाखेल र तेस्रो खेलमा मछिन्द्रलाई पराजित गरेको छ । पछिल्लो हारपछि दुवै टोली जितको लय कायम गर्न इच्छुक हुनेछन् ।

अर्को खेलमा शीर्षस्थानमा रहेको मनाङलाई अग्रता बढाउने मौका हुनेछ । दोस्रो स्थानको थ्री स्टारले समान १२ अंक जोडेपनि मनाङले एक खेल कम खेलेको छ । यो खेल जितेमा अग्रता ३ अंकको हुनेछ । आइतबार समान १० अंक बोकेको हिमालयन शेर्पा र त्रिभुवन आर्मीको खेल हुँदैछ । उक्त खेल बराबरी भए मनाङले अग्रतालाई ३ अंकमा पुर्याउनेछ ।

सरस्वती भने लगातार जित दर्ता गरेर लय समाउन प्रयासरत छ । सुरुवाती दुई खेलमा पराजित सरस्वति पछिल्लो दुई खेलमा विदेशी खेलाडीको आगमनसँगै बलियो रुपमा प्रस्तुत भएको छ । विदेशी खेलाडी भिक्टर सरस्वतीको नतिजामा निर्णायक भूमिका खेल्दै आएका छन् । उनले यसअघि मनाङ र थ्री स्टारबाटै खेलिसकेका छन् ।

आजको खेल :

मंसिर १५ : संकटा विरुद्ध च्यासल – ११:०० – हल्चोक

मंसिर १५ : मनाङ विरुद्ध सरस्वती – २:३० – हल्चोक