काठमाडौं (हाम्रो खेलकुद) – पल्सर सहिद स्मारक ए डिभिजन लिग अन्तर्गत बिहीबार भएका दुवै खेल गोलरहित बराबरीमा टुंगिए । यससँगै छैटौं चरणको खेल समाप्त भएको छ ।

बिहीबार एनआईबीएल फ्रेन्ड्स क्लबले त्रिभुवन आर्मी क्लबलाई रोक्दा गोलरक्षक देव लिम्बूले उत्कृष्ट प्रदर्शन गरे । आर्मीका नियमित फरवार्ड कप्तान भरत खवास दोहोरो पहेंलो कार्डका कारण प्रतिबन्धमा परेपछि आर्मीको आक्रमण फितलो देखियो । फरवार्ड नवयुग श्रेष्ठले चोटका बाबजुद पनि अन्तिम २० मिनेट खेले तर गोल गर्न भने सकेनन । उनको उपस्थितिमा टोलीको आक्रमण केहि बलियो देखिएपनि टंक बस्नेतले अवसर सदुपयोग गर्न नसक्दा आर्मी बराबरीमा रोकियो ।

पुछारका ब्रिगेड ब्वाइज क्लब र मछिन्द्र क्लबको खेलमा पनि गोल हुन सकेन । मछिन्द्रले लिगको ६ खेल सकिंदासम्म पनि गोल गर्न सकेको छैन । तीन गोलरहित बराबरी खेलेको मछिन्द्रले तीन खेलमा पराजय भोगेको छ । लिगको पहिलो खेलमा च्यासल र दोस्रोमा पुलिसलाई रोक्दा डिफेन्डर विकास राईले उत्कृष्ट प्रदर्शन गर्दै म्यान अफ द म्याचको उपाधि पाएका थिए । यो मछिन्द्रको लिगमा तेस्रो बराबरी हो । ब्रिगेड ब्वाइजले भने ६ खेलमा १ जित र १ बराबरीसँगै ४ अंक जोडेको छ ।

लिगको छैटौं चरण सकिँदा मनाङ मर्स्याङदी क्लबले ६ खेलमा शत प्रतिशत जितको नतिजासहित शीर्ष स्थानमा छ । रुस्लान थ्री स्टार क्लब र सीएमजी क्लब संकटा ६ खेलमा ५ जितसहित १५ अंक बोक्दै क्रमश: दोस्रो र तेस्रो स्थानमा छन् । चौथो स्थानमा अपराजित नतिजा हासिल गर्दै ६ खेलमा ४ जित र २ बराबरी हासिल गरेको आर्मी १४ अंकमा छ ।

नेपाल पुलिस क्लब र हिमालयन शेर्पा क्लब ६ खेलमा समान ३ जित, १ बराबरी र २ हारसहित १० अंक जोड्दै क्रमश: पाँचौ र छैटौं स्थानमा छन् । सातौं र आठौं स्थानका च्यासल र एपीएफले २ जित र १ बराबरीसँगै ७ अंक जोडेका छन् । नवौं स्थानमा २ जितसहित ६ अंक जोडेको सरस्वती रहेको छ ।

लिगमा १ जित र २ बराबरी खेलेको फ्रेन्ड्स ५ अंक जोड्दै दशौं स्थानमा छ भने जावलाखेल ४ अंक जोडेपनि गोलअन्तरको आधारमा ११ औं स्थानमा छ । समान ४ अंक जोडेको ब्रिगेड ब्वाइज १२ औं स्थानमा छ । जितविहीन मछिन्द्र र एनआरटी क्रमश: ३ र १ अंकसहित पुछारको दुई स्थानमा रहेका छन् ।

अंक तालिका :