काठमाडौ- पोखरामा हुने दुई ठूला फुटबल प्रतियोगिता मध्येको एक मनकामना केबलकार पोखरा कप फुटबल प्रतियोगिता भोली (मंगलबार) बाट सुरु हुने भएका छ । अर्को ठूलो प्रतियोगिता आहा रारा गोल्डकप केही महिना अघि नै सम्पन्न भइसकेको छ । आहा रारा सहारा क्लबले आयोजना गर्दछ भने पोखरा कपको आयोजक जिल्ला फुटबल संघ कास्की हो ।
पोखरा कपको विजेताले पाउने रकममा यसपटक डेढलाख भन्दा बढी थपिने आयोजक संघले जानकारी दिएको छ । यसअघि ३ लाख ५५ हजारको प्रथम पुरस्कार थियो भने यसपटक ५ लाख ५ हजार ५ सय ५५ रुपैयाँ पाउनेछन् । त्यस्तै दोस्रो हुने टोलीले २ लाखा ५५ हजार ५ सय ५५ पाउनेछ । यसअघि उपविजेताले २ लाख १ हजार पाउदै आएको थियो ।
पोखरा रंगशालामा वैशाख ११ गते सम्म चल्ने प्रतियोगितामा १ विदेशीसहित १२ टोलीको सहभागिता रहने संघले जनाएको छ । प्रतियोगितामा ए डिभिजन क्लब रुस्लान थ्री स्टार, लक्ष्मी हुन्डाई मनाड् मस्र्याड्दी, त्रिभुवन आर्मी, नेपाल पुलिस र एपिएफले प्रतिस्पर्धा गर्नेछन् । त्यस्तै पूर्वाञ्चल, पश्चिमाञ्चल, झापा, धरान, रुपन्देही, सिमरा र आयोजक कास्कीको पोखराले पनि प्रतियोगिता भाग लिएको छ । एकमात्र विदेशी टोलीका रुपमा भारतको नयाँ दिल्लीको युनाइटेड क्लबको सहभागिता रहेको छ ।
प्रतियोगिता पुसमा हुनुपर्ने भएपनि नाकावन्दीका कारण पछि सार्नुपरेको जिल्ला संघ कास्कीका अध्यक्ष धरमबहादुर लामिछानेले बताए । मंगलबार एपिएफ र सिमराबीच उद्घाटन खेल हुनेछ ।
