सुनिल गाउँले
सिमरा – सिएमजी क्लब संकटा क्लब रुस्लान सिमरा गोल्ड कप फुटबल प्रतियोगिताको क्वार्टरफाइनलमा पुगेको छ । अर्को ए डिभिजन क्लब सरस्वती युथ क्लबलाई टाइब्रेकरमा ३–१ ले हराउँदै संकटा अन्तिम आठमा पुगेको हो । अब संकटाले माघ ८ गते रुस्लान थ्री स्टारसँग प्रतिस्पर्धा गर्नेछ ।
शनिबार निर्धारित ९० मिनेटको खेल १–१ को बराबरीमा टुंगिएपछि टाइब्रेकरमा संकटा विजयी भएको थियो । ३८ औं मिनेटमा मोहन गुरुङको गोलबाट सरस्वतीले अग्रता लिएको थियो । तर, त्यसलाई सरस्वतीले जोगाउन सकेन । ५८ औं मिनेटमा जय गुरुङले गोल फर्काउँदै संकटालाई खेलमा फर्काएका थिए ।
९० मिनेटपछि सोझै पेनाल्टीमा गएको खेलको नायक रहे संकटाका गोलकिपर राजबाबु थापा । उनले सरस्वतीका ३ खेलाडी भिक्टोर, रमेश घिसिङ र दीपक गुप्ताको पेनाल्टी रोकेका थिए । सरस्वतीका मोहन गुरुङले मात्र पेनाल्टीमा गोल गरे ।
संकटाका लागि सुरज गुरुङ, लक्ष्मण रुचाल, रोमन लिम्बुले गोल गरे । दीपेश आलेमगरको प्रहार बारमा लागेर फर्कियो भने अमित तामाङको प्रहार बाहिरियो । संकटाका गोलकिपर राजबाबु खेलको म्यान अफ दी म्याच घोषित भए र उनले १० हजार रुपैयाँ प्राप्त गरे ।
नवजनजागृति युवा क्लबको आयोजनामा जारी सिमरा गोल्डकपको दसौं संस्करणमा आइतबार दुई विभागिय टोली एपिएफ र त्रिभुवन आर्मी क्लबबीच प्रतिस्पर्धा हुनेछ ।
