एजेन्सी – स्पेनिस ला लिगा फुटबलमा रियल मड्रिडले सेभियालाई पराजित गरेको छ । घरेलु मैदानमा रियलले सेभियालाई २–० ले पराजित गरेको हो ।
घरेलु मैदान सान्टियागो बर्नबेउमा शनिबार राति भएको खेलमा रियललाई जिताउन क्यासमिरो र लुका मोड्रिचले गोल गरे ।
सेभियालाई दवावमा राखेपनि रियलले गोलको लागि दोस्रो हाफ नै कुर्नुपरेको थियो । यता, सेभियाले रियललाई पहिलो हाफमा बराबरीमा रोक्न सफल भएपनि दोस्रो हाफमा रियललाई रोक्न सकेन ।
७८औं मिनेटमा क्यासमिरोले गोल गर्दै रियललाई अग्रता दिलाएका थिए । सेभियाको डिफेन्डरको गल्तीमा सर्जियो रिगुइलनले दिएको पासलाई गोलमा परिणत गरेका थिए । इन्ज्युरी समयको थप गरिएको दोस्रो मिनेटमा मिडफिल्डर लुका मोड्रिचले गोल गर्दै रियललाई २–० को जित दिलाए ।
जितपछि रियल तेस्रो स्थानमा उक्लन सफल भएको छ । रियलले सेभियालाई नै पछि पार्दै तेस्रो स्थानमा उक्लन सफल भएको हो । रियलको २० खेलबाट ३६ अंक पुगेको छ । समान खेलबाट सेभियाको ३३ अंक छ । ४३ अंक जोडेर बार्सिलोना शीर्ष स्थानमा रहँदा एट्लेटिको मड्रिडले ४१ अंक जोडेर बार्सिलोनालाई पछ्याइरहेको छ ।
