काठमाडौं (हाम्रो खेलकुद) – कोरियाली फुटबल संघले अखिल नेपाल फुटबल संघ (एन्फा) लाई खेल समाग्री सहयोग गरेको छ । अर्को महिना साफ च्याम्पियनसिप खेल्ने तयारीमा रहेको नेपाली महिला टोलीलाई लक्षित गर्दै कोरियाली फुटबल संघले सहयोग गरेको हो ।

साफ च्यापियनसिप अघि नेपाली टोली एउटा प्रतियोगितामा भाग लिन भारत जाने तयारीमा छ । भारतको भुवनेश्वरमा आयोजना हुन लागेको चार देशबीचको मैत्रीपुर्ण सिरिज खेल्न जाने नेपाली महिला फुटबल टोलीलाई बिदाई गर्न आयोजना गरिएको कार्यम दौरान नै एन्फालाई ८ सय ९७ थान फुटबल किट हस्तान्तरण गरिएको हो ।

कोरियन फुटबल संघका अध्यक्ष चुङ मोङ ज्युले नेपाली टोलीलाई बधाईको शुभकामना दिदै ओलम्पिक छनोटमा राम्रो प्रदर्शन गर्न शुभकामना व्यक्त गरे । उनले नेपाली टोली ओलम्पिक छनोटको दोस्रो चरणमा नेपाली टोलीले राम्रो प्रदर्शन गर्नेमा आशावादी रहेको र फाइनलमा कोरियासँग खेल्ने आशा रहेको बताए । एन्फा अध्यक्ष शेर्पाले कोरियन फुटबल संघका अध्यक्ष चुङ मोङ ज्युलाई उपहारको लागि धन्यवाद व्यक्त गरे ।

खेलाडीलाई एन्फा अध्यक्ष कर्मा छिरिङ शेर्पा कोरियन फुटबल फेडेरेसनका अध्यक्ष चुङ मोन ज्यु लगायत एन्फाका पदाधिकारी बिदाई गरे । प्रतियोगिताकै तयारीका लागि घासे मैदानमा अभ्यास गर्न नेपाली टोली बुधबार झापा जानेछ । त्यहाँको केही दिनको प्रशिक्षण पछि नेपाली टोली भुवनेश्वर प्रस्थान गर्नेछ ।
चार देशबीचको सिरिज भारतको भुवनेश्वरमा फेब्रुअरी ७ बाट १७ फेब्रुअरीसम्म चल्नेछ । सिरिजमा आयोजक भारत, नेपाल, म्यानमार र श्रीलंकाको सहभागिता रहेको छ ।

यसै प्रतियोगिताका लागि नेपाली महिला टोलीका मुख्य प्रशिक्षक हरि खड्काले शुक्रबार निरु थापाको कप्तानीमा २३ सदस्यीय नेपाली टोलीको घोषणा गरेको थियो । यही २३ सदस्यीय टोलीबाट साफका लागि २० खेलाडी छनोट गरिने प्रशिक्षक हरि खड्काले बताएका छन् ।

यो प्रतियोगितालाई आसन्न नेपालमै हुने पाँचौ महिला साफ च्याम्पियनसिपको तयारीको रुपमा हेरिएको छ । महिला साफ च्याम्पियनसिप विराटनगरमा १२ देखि २२ मार्चसम्म चल्नेछ । नेपाल रहेको समूह ‘ए’ मा बंगलादेश, भुटान र पाकिस्तान रहेका छन् ।

नेपाली टोली
गोलरक्षकः अन्जना रानामगर, उषानाथ र एन्जिला तुम्वाप्पो सुब्बा ।
डिफेन्डरः हीरा कुमारी भुजेल, गीता राना, पुनम जर्घामगर, अमृता जैसी, कविता धिमाल, सुनिता चौधरी, पुजा राना र मनमाया लिम्बु ।
मिडफिल्डरः बिमला चौधरी, अनिता बस्नेत, दीपा राई, मन्जली कुमारी योन्जन, शर्मिला थापा, सरु लिम्बु, रेनुका नगरकोटी र अनिता केसी ।
फरवार्डः अनु लामा, रेखा पौडेल, निरु थापा (कप्तान) र सावित्रा भण्डारी ।