इटहरी (हाम्रो खेलकुद) – पल्सर सहिद स्मारक ए डिभिजन लिग च्याम्पियन सिग्नेचर मनाङ मस्र्याङ्दी क्लब मदन भन्डारी स्मृति अन्तर्राष्ट्रिय आमन्त्रण इटहरी गोल्डकप फुटबलको सेमिफाइनलमा पुगेको छ ।

आयोजक राष्ट्रिय जागृति क्लबलाई २–१ ले हराउँदै मनाङ अन्तिम चारमा पुगेको हो । मनाङले अब सेमिफाइनलमा नेपाल पुलिस क्लब र भुटान सिएफसीमध्ये एकसँग माघ १७ गते सेमिफाइनल खेल्नेछ ।

७५ औं मिनेटमा कमल श्रेष्ठलवे गरेको गोल निर्णायक बनेपछि मनाङ अघिल्लो चरण पुग्न सफल भएको हो । गत महिना लिग च्याम्पियन बनेपछि मनाङको यो दोस्रो प्रतियोगिता हो । टोलीले यसअघि सुदूरपश्चिम खप्तड गोल्डकपमा पहिलो चरण मै पराजित भएको थियो ।

३४ औं मिनेटमा सुजल श्रेष्ठको गोलबाट मनाङले पहिलो हाफमा अग्रता लिएको थियो । तर ६३ औं मिनेटमा आयोजक टोलीका उमेश राईले गोल फर्काउदै खेललाइ बराबरीमा पु¥याएका थिए । खेल सकिन १५ मिनेट बाँकी रहँदा कमलको गोलले मनाङ अघिल्लो चरण पुग्न सफल भयो । मनाङका कमल म्यान अफ दी म्याच घोषित भए र उनले १० हजार रुपैयाँ प्राप्त गरे ।

पहिलो दिन शनिबार क्यामरुनको दाफिन्स फुटबल टिमलाई टाइब्रेकरमा हराउँदै मेची नेत्रालय काकरभिट्टा फुटबल ट्रेनिङ सेन्टर अन्तिम चारमा पुगेको थियो । प्रतियोगितामा सोमबार रुस्लान थ्री स्टार क्लब र त्रिभुवन आर्मी क्लबबीच प्रतिस्पर्धा हुनेछ ।

यी दुई टोली शनिबार रुस्लान सिमरा गोल्डकपको फाइनलमा भिड्दा सडन डेथमा थ्री स्टार भाग्यशाली रहेको थियो । मदर भण्डारी स्मृति इटहरी गोल्डकपको विजेताले १६ लाख रुपैयाँ प्राप्त गर्नेछ ।