इटहरी (हाम्रो खेलकुद)– चर्चित दुई ए डिभिजन टोली रुस्लान थ्री स्टार क्लबल र त्रिभुवन आर्मी क्लब फेरि एक पटक अर्कोविरुद्ध उत्रदैछन् । रुस्लान सिमरा गोल्डकप फुटबल प्रतियोगिताको फाइनल खेलेको दुई दिनपछि सोमबार यी दुई टोली मदन भण्डारी स्मृति इटहरी गोल्डकपको क्वार्टरफाइनलमा प्रतिस्पर्धा गर्दैछन् ।

यी दुई टोलीले पछिल्लो दुई सातामा एक एक उपाधि जितेर इटहरी पुगेका छन् । रुस्लानले शनिबार आर्मीलाई सडन डेथमा हराएर पहिलो पटक सिमरा गोल्डकप जितेको थियो । आर्मीले सिमरा पुग्नुअघि वीरगन्जको विशाल मेमोरियल गोल्डकपको उपाधि जितेको थियो ।

थ्री स्टारले भने वर्षको सुरुवातमा माइभ्याली गोल्डकप र उदयपुर गोल्ड कप जितेको थियो । सिमरा पुग्नुअघि भने थ्री स्टार सुदूरपश्चिम खप्तड गोल्ड कपको फाइनलमा नेपाल पुलिस क्लबसँग पराजित भएको थियो ।

शनिबार भएको सिमरा गोल्डकपको फाइनलको निर्धारित समय गोलरहित बराबरीमा टुंगिएपछि खेल टाइब्रेकरमा गएको थियो । टाइब्रेकरको ५/५ पेनाल्टीमा ४–४ को बराबरीपछि खेल सडन डेथमा पुगेको थियो । जसमा थप ४/४ पेनाल्टी हन्दा अन्तमा थ्री स्टार ७–६ ले विजयी भएको थियो । थ्री स्टारका गोलकिपर एलन न्यौपानेले ३ पेनाल्टी रोकेका थिए । अन्त्यमा आर्मीका सुमन अर्यालको प्रहारलाई एलनले रोके भने थ्री स्टार रञ्जन विष्ट गोल गर्न सफल भए ।

इटहरी गोल्डकपमा आजको खेल जित्ने टोलीले सेमिफाइनलमा मेत्री नेत्रालय काकरभिट्ट ट्रेनिङको सामना गर्नेछ । पल्सर सहिद स्मारक ए डिभिजन लिगको विजेता सिग्नेचर मनाङ मस्र्याङ्दी क्लब पनि इटहरी गोल्डकपको सेमिफाइनलमा पुगिसकेको छ । इटहरी गोल्डकपको विजेताले उपाधिसहित १६ लाख रुपैयाँ प्राप्त गर्नैछ ।