पोखरा(हाम्रो खेलकुद)- विभागीय नेपाल एपीएफ क्लब गन्डकी प्रदेशको सदरमुकाम कास्कीको पोखरामा मंगलबारबाट सुरु भएको छैटौ मनकामना केबलकार पोखरा कपमा विजयी भएको छ ।

पोखरास्थित पोखरा रंगशालाको खेल मैदानमा मंगलबार भएको उद्घाटन खेलमा एपीएफले हिमालयन शेर्पा क्लबलाई २–१ ले पराजित गर्दै विजयी सुरुवात गरेको हो । जितसँगै एपीएफ प्रतियोगिताको क्वाटरफाइनलमा प्रवेश गर्न सफल भएको छ ।

एपीएफको जितमा आशिष लामा र सुदिप शिख्राकारले गोल गरे । शेर्पाका अमर डंगोलले एक गोल फर्काए । प्रतिस्पर्धात्मक बनेको खेलको २४औं मिनेटमा आशिष लामाको गोलबाट एपीएफले सुरुवाती अग्रता बनाएको थियो ।

५५औं मिनेटमा शेर्पाका अमर डंगोलले गोल गर्दै खेललाई १–१ गोलको बराबरीमा ल्याए । ७८औं मिनेटमा सुदिप शिख्राकारले गोल गर्दै एपीएफलाई २–१ को जित दिलाए । प्रतियोगिता अन्तरगत बुधबार च्यासल युथ क्लब र क्यामरुनको दाफिन्स फुटबल क्लबबीच खेल हुनेछ ।

कास्की जिल्ला फुटबल संघको आयोजनामा पोखरा रंगशालामा हुने प्रतियोगितामा दुई विदेशी टिमसहति १२ टोलीको सहभागिता रहेको छ । दुई विदेशी टोलीमा जापानको रिस्से विश्व विद्यालय र क्यामरुनको दाफिन्ट फुटबल टोली रहेका छन् ।

नेपालका मनाङ–मस्र्याङदी, संकटा, थ्री स्टार, त्रिभुवन आर्मी, नेपाल पुलिस, एपीएफ, हिमालयन शेर्पा, च्यासल, ब्रिगेड ब्वाइज र आयोजकको पोखरा–११ रहेका छन् । विजेताले ७ लाख ५५ हजार र उपविजेताले ४ लाख ५ हजार रुपैयाँ पुरस्कार प्राप्त गर्नेछन् । उत्कृष्ट खेलाडीलाई मोटरसाइकल प्रदान गरिनेछ । पाँच विधाका उत्कृष्ट खेलाडीले जनही २५ हजार पाउने छन् ।