एजेन्सी – वैकल्पिक खेलाडीको रुपमा मैदान प्रवेश गरेका फरवार्ड पाउलो डीबालाले निर्णायक गोल गरेपछि युभेन्ट्सले इटालियन सिरी ए अन्तर्गत आइतबार बोलोग्नालाई १-० ले पराजित गरेको छ ।

लिगमा अपराजित रहेको युभेन्ट्सले पहिलो हाफमा गोल गर्न सकेन । दोस्रो हाफको ६७ औं मिनेटमा डीबालाले गोल गर्दै युभेलाई अगाडी बढाए । ब्लेस माटुइडीको क्रसलाई बोलोग्नाले राम्रोसँग क्लियर गर्न नसक्दा डीबालाले त्यसै बलमा गोल गरेका थिए ।

खेल अवधिभर युभेन्ट्सको तुलनामा धेरै अवसर सिर्जना गरेको बोलोग्नाले गोल गर्न भने सकेन । निकोला सान्सोनेले इन्युरी समयमा खेल बराबरी ल्याउने प्रयास गरेपनि उनको शक्तिशाली प्रहारलाई युभेका गोलरक्षक माटिया पेरिनले विफल पारे ।

क्रिस्टियानो रोनाल्डोले भने सेप्टेम्बर यता पहिलो पटक अवे खेलमा गोल गर्न सकेनन् । उनले पछिल्लो ९ अवे खेलमा लगातार गोल गरेका थिए । उनले सन् १९९२-९३ मा गिसेपे सिग्नोरीले राखेको कीर्तिमानलाई बराबरी गर्न बोलोग्नाविरुद्ध गोल गर्नुपर्ने आवश्यकता थियो ।

यस जितसँगै युभेन्ट्सले लिगको शीर्ष स्थानमा १३ अंकको अग्रता बनाएको छ । युभेन्ट्सको २५ खेलमा ६९ अंक छ । नेपोलीको २५ खेलमा ५६ अंक रहेको छ । नेपोलीले आइतबार पार्मालाई ४-० ले पराजित गर्दै युभेमाथि दबाब बनाउने प्रयास जारि राख्यो ।