सुबास हुमागाईं, काठमाडौं
बंगलादेशका प्रशिक्षक गोलाम रोब्बानी छोटोंले दक्षिण एसियाको फुटबल विगत एक दशकयता नजिकबाट नियालेका छन् । नेपाल र बंगलादेशले यसबीचमा ५ पटक एकआपसमा खेलेका छन् । तर छोटोंले जित दर्ता गर्न भने सकेका छैनन् । शनिबारको खेल उनको लागि अर्को अवसर हुनेछ ।
बिहीबार पाँचौ महिला साफ च्याम्पियनसिपको समूह ए अन्तर्गत दोस्रो खेलमा बंगलादेशले भुटानमाथि २-० को जित दर्ता गर्यो । खेलदौरान बंगलादेशले एकतर्फी रुपमा दबाब बनाउँदै गोल गर्ने अवसर लगातार सिर्जना गरेपनि फिनीसिङमा भने चुक्न पुग्यो । ठिक त्यसै अवस्थामा मंगलबारको खेलमा नेपाल पनि चुकेको थियो । भुटानलाई ३-० ले हराउँदा नेपाली टोलीले थुप्रै गोल गर्ने अवसर सदुपयोग गर्न सकेन । शनिबार सेमिफाइनल पुगिसकेका दुवै टोली समूह विजेता बन्न जितका लागि मैदानमा उत्रनेछन् ।
प्रशिक्षक हरि खड्काले नेपाली टोलीको जिम्मेवारी सम्हालेको धेरै समय भएको छैन । तर यसबीचमा उनले टोलीसँग रहेर तेस्रो प्रतियोगितामा जिम्मेवारी वहन गरिरहेका छन् । टोकियो ओलम्पिक २०२० को पहिलो चरणको छनोट र भारतमा आयोजित हिरो गोल्डकपहुँदै खड्का अहिले साफ च्याम्पियनसिपमा प्रशिक्षण सम्हालिरहेका छन् ।
यसक्रममा उनले टोलीलाई ऐतिहासिक नतिजा दिलाउँदै प्रतियोगिताको बलियो दावेदारको रुपमा उभ्याएका छन् । प्रतियोगिताको सबै टोलीको खेल हेर्दा कागज मात्र नभएर मैदानमा पनि नेपाल नै बलियो छ । बंगलादेशविरुद्ध शनिबारको खेलले नेपालको उपाधि दावेदरितालाई थप बढावा दिनेछ । नेपाली टोलीका प्रशिक्षक हरि खड्का बंगलादेशविरुद्ध आफ्नो टोली पूर्ण रुपमा आक्रमणमा केन्द्रित भएर खेल्ने बताउँछन् । ‘ हामीसँग दक्षिण एसियाकै उत्कृष्ट आक्रमण रहेको छ । हामीले बंगलादेशविरुद्ध पूर्ण रुपमा आक्रमक रणनीति लिएर नै खेल्नेछौं । हामी बंगलादेशलाई पराजित गरेर समूह विजेताको रुपमा अगाडी बढ्न चाहन्छौं,’ खड्काले भने । उनले बंगलादेश पछिल्लो समय निकै राम्रो प्रदर्शन गर्दै आएको टोली भएपनि नेपालको तुलनामा भने पछाडी नै रहेको बताए ।
खड्काको प्रशिक्षकत्वमा नेपालले केहि महिना अघिमात्र म्यानमारमा बंगलादेशविरुद्ध पहिलोपटक बराबरी खेलेको थियो । खड्का उक्त खेलको अन्तिम समयमा रणनीतिक रुपमा सानो गल्ति हुँदा खेल गुमाउन पुगेको स्वीकार्दै त्यसलाई बिर्सन चाहन्छन् । ‘ हामीले म्यानमारमा भएको प्रतियोगितामा अग्रता लिएपछि खेल सक्ने योजनामा खेल्यौं । इन्ज्युरी समयको पनि अन्तिम मिनेटमा डिफेन्सको गल्तीमा गोल हुन पुग्यो । फुटबलमा कहिलेकाहीं यस्तै हुन्छ । अब शनिबार हामी जितको लागि नै खेल्नेछौं ,’ खड्काले भुटानविरुद्ध जितपछि भनेका थिए ।
यता बंगलादेशका प्रशिक्षक छोटोंले नेपाल उत्कृष्ट टोली र उपाधि दावेदार भएपनि बंगलादेशले कठिन चुनौति दिने बताए । ‘हामीले नेपाललाई यसअघि ओलम्पिक छनोटमा बराबरीमा रोकेका हौँ । अन्तिम समयमा हामीले खेल बराबरीमा ल्याएका थियौं । हामीले नेपालको खेल हेरेका छौं र त्यसअनुसार तयारी पनि राम्रो गरेका छौं । शनिबारको खेलका लागि हामी तयार छौं,’ उनले भने ।
नेपालले हालसम्म बंगलादेशविरुद्ध खेलेका ५ खेलमा ४ जित र १ बराबरी खेलेको छ । पछिल्लोपटक म्यानमारमा १-१ को बराबरीमा खेल्दा नै नेपालले बंगलादेशविरुद्ध पहिलो गोल खाएक थियो । शनिबार नेपालले बंगलादेशको आक्रमणलाई निस्तेज मात्र पार्न सकेपनि समूह विजेता बन्नेछ । तर प्रशिक्षक हरि खड्काको भनाइ मान्ने हो भने नेपाल जितका लागि खेल्नेछ र जित्नेछ पनि । दक्षिण एसियाकै उत्कृष्ट आक्रमणको संज्ञा प्रशिक्षकले दिएपछि खेलाडीले पनि सिद्ध पार्न जरुरि छ ।
बंगलादेशविरुद्ध खेलअघि के भन्छन् प्रशिक्षक हरि खड्का?
बंगलादेशविरुद्ध खेलअघि नेपालको प्रशिक्षणको तस्बिर हेर्न यहाँ थिच्नुहोस्
