विराटनगर (हाम्रो खेलकुद) – नेपाली महिला राष्ट्रिय फुटबल टोलीले साफ महिला च्याम्पियनसिपको समूह ‘ए’ को अन्तिम खेलमा शनिबार बंगलादेशसँग खेल्दैछ । खेल विराटनगरस्थित शहिद रंगशालामा दिउँसो ३ बजे सुरु हुनेछ ।

पहिलो खेलमा नेपालले भुटानलाई ३-० ले पराजित गरेको थियो । उक्त खेलमा नेपालले खेल अवधिभर भुटानमाथि दबाब बनाउँदै गोल गर्ने थुप्रै अवसर पनि सिर्जना गर्यो । तर फिनिसिङमा खेलाडीहरुले चुस्त प्रदर्शन गर्न नसक्दा जितको अन्तर खासै ठूलो हुन सकेन । नेपाली खेलाडी ‘फाइनल थर्ड‘ मा हतारिएको र सिधै पोस्टको दिशामा गएका देखिन्थे ।

अनिता बस्नेत र मन्जलीकुमारी योन्जनको रुपमा नेपालसँग उत्कृष्ट विंगर छन्, तर भुटानविरुद्ध दुवै खेलाडी विल्ड अप गर्ने भन्दा पोस्ट आक्रमणमा धेरै व्यस्त देखिए । यता फरवार्डद्वय सावित्रा भण्डारी र निरु थापाले पनि आफूले पाएका अवसर सदुपयोग गर्न सकेनन् । भुटानी गोलरक्षकले पनि राम्रो प्रदर्शन गर्दा नेपालको गोलअन्तर अपेक्षित रुपमा फराकिलो हुन सकेन ।

तुलनात्मक रुपमा नेपालको डिफेन्स आक्रमणभन्दा कमजोर नै मानिन्छ । भुटानविरुद्ध नेपालको रक्षापंक्तिले खासै मिहिनेत गर्नु परेन । तर आवश्यक परेको केहि अवस्थामा पनि डिफेन्सले गल्ति गरेको थियो । प्रशिक्षक हरि खड्काले भुटानविरुद्ध उत्रिएको पहिलो रोजाइमा एक खेलाडी परिवर्तन गर्ने सम्भावना रहेको छ । अमृता जैशीको स्थानमा पुनम जर्घा मगरले टोलीमा स्थान बनाउने सम्भावना रहेको छ ।

यो पनि पढ्नुहोस :आक्रामक नेपाललाई रोक्न तत्पर बंगलादेश

गोलरक्षकमा एन्जिला तुम्बापो सुब्बाले निरन्तरता पाउनेछिन् । डिफेन्डमा गीता राना, हिराकुमारी भुजेलको स्थान पक्का छ भने मनमाया लिम्बू र पुनमले उनीहरुलाई साथ दिनेछन् । मिडफिल्डमा दिपा राई र रेनुका नगरकोटे रहनेछन् । विङ्गमा अनिता बस्नेत र मन्जलीले आक्रमणलाई सहयोग दिनेछन् । कप्तान निरु र सावित्राले पछिल्लो खेलको कमजोरी सुधार्दै गोलसंख्या बढाउने लक्ष्य पूरा गर्ने अपेक्षा राखिएको छ ।

नेपालले बंगलादेशविरुद्ध हालसम्म ५ खेल खेलेको छ जसमा ४ जित र १ बराबरी रहेको छ । यसक्रममा नेपालले दुई पटक ३-० र दुई पटक १-० को जित दर्ता गरेको छ । पछिल्लो पटक म्यानमारमा भएको ओलम्पिक छनोटमा दुई टोलीले १-१ को बराबरी खेलेका थिए ।