विराटनगर (हाम्रो खेलकुद) – नेपाली महिला राष्ट्रिय टोलीले साफ महिला च्याम्पियनसिप अन्तर्गत समूहको अन्तिम खेलमा बंगलादेशको सामना गर्दैछ । पछिल्लो खेलबाट प्रशिक्षक हरि खड्काले एक परिवर्तन गरेका छन् ।
डिफेन्समा एक परिवर्तनस्वरुप पुनम जर्घामगर टोलीमा फर्किएकी हुन् । उनले अमृता जैशीको स्थान लिनेछिन् । पुनमले पछिल्लो समय निरन्तर सुरुवाती रोजाईमा खेलेपनि प्रशिक्षक खड्काले भुटानविरुद्ध अमृतालाई मौका दिएका थिए ।
गोलरक्षकमा एन्जिला तुम्बापो सुब्बाले निरन्तरता पाउनेछिन् । डिफेन्समा गीता राना, हिराकुमारी भुजेलसँगै मनमाया लिम्बू र पुनमले उनीहरुलाई साथ दिनेछन् । मिडफिल्डमा दिपा राई र रेनुका नगरकोटे रहनेछन् ।
विङ्गमा अनिता बस्नेत र मन्जलीले आक्रमणलाई सहयोग दिनेछन् । कप्तान निरु थापा र सावित्रा भण्डारीले पछिल्लो खेलको कमजोरी सुधार्दै गोलसंख्या बढाउने लक्ष्य पूरा गर्ने अपेक्षा राखिएको छ ।
