विराटनगर (हाम्रो खेलकुद) – पाँचौ साफ महिला च्याम्पियनसिपको समूह चरणको अन्तिम खेलमा नेपालले बंगलादेशमाथि पहिलो हाफमा ३–० को अग्रता बनाएको छ ।
विराटनगरस्थित सहिद रंगशालामा भएको समूह चरणको अन्तिम खेलमा नेपालले सावित्रा भण्डारी र मन्जली कुमारी योन्जनको गोलबाट पहिलो हाफमा ३–० को अग्रता बनाएको हो । एक गोल भने नेपालले उपहार पाएको थियो ।
खेलको शुरुवातबाटै नेपालले आक्रमक खेल पस्केको थियो । खेलको छैटौं मिनेटमा सावित्रा भण्डारीले वान भर्सेस वानको अवस्थामा गोल गर्न चुकेपनि केहिबेरमै नेपालले आत्मघाती गोलबाट अग्रता बनायो । कप्तान निरु थापाको चलाखीपुर्ण पासमा सावित्राले गोलरक्षकलाई बिट गरेपनि गोल गर्न सकेको थिएन । सोही समयमा मनमाया लिम्बूको क्रसमा मसुरा प्रभिनले हेडमार्फत बचाउन खोजेपनि गोल हुन पुगेको थियो ।
१०औं मिनेटमा कप्तान निरु थापा पनि वान भर्सेस वानमा चुकिन् । उनको फितलो चिप प्रहार पहिलो बारबाट थोरै बाहिरियो । १५औं मिनेटमा मन्जली कुमारी योन्जको पेनाल्टी एरियाभित्रको प्रहारलाई बंगलादेशकी गोलरक्षक रुपना चक्नाले मुस्किलले बचाइन् ।
१७औं मिनेटमा सावित्रा भण्डारीको हेडर पोस्टबाट थोरै बाहिरियो । लगतार दुई सुन्दर मौका खेर फालेकी सावित्राले २३औं मिनेटमा गोल गरेपछि नेपालले खेलमा २–० को अग्रता बनायो । उनले डिफेन्डरबाट बल खोस्दै गरेको प्रहार दोस्रो नजिकबाट गोल भएको थियो ।
२८औं मिनेटमा मन्जली कुमारी योन्जनले गोल गर्दै नेपाललाई पहिलो हाफमा ३–० को अग्रता दिलाइन् । उनले सावित्रा भण्डारीको पासलाई गोलमा परिणत गरिन् । बंगलादेशले भने नेपालको पोस्टमा गतिलो अक्रमण बुन्न सकेन ।
दोस्रो हाफ केहीबेरमा सुरु हनेछ ।
