युइएफएका अध्यक्ष मिचेल प्लाटिनी
आफ्नो बारेमा फैसला आएपछि ६० बर्षे प्लाटिनीले जिम्मेवारीबाट अलग हुने बताएका छन् । प्लाटिनी र फिफाका पूर्व अध्यक्ष सेप ब्लाटर भूक्तानीका क्रममा दोषी पाइएका थिए ।
दुवैले गलत काम नगरेको दाबी गर्दै आएका थिए । सुरुमा उनीहरुमाथि ८ बर्षको प्रतिबन्ध लागेपनि पछि ६ बर्षमा घटाइएको थियो । प्लाटिनीका बारेमा तीन सदस्यीय न्यायिक निकायले गैरकानुनी रुपमा भुक्तानी दिएको होइन भन्ने मान्न नसकिने बताएको छ ।
सन् २०११ मा ब्लाटरले प्लाटिनीलाई दिएको भूक्तानीका कारण दुवै विवादमा मात्र परेनन्, प्रतिबन्धमा समेत परेको थियो । उक्त मुद्दालाई स्वीस अदालतमा समेत विचाराधिन छ । कासको फैसलापछि प्लाटिनीले विज्ञप्तीमा भनेका छन्, युइएफएको सबै खाले जिम्मेवारीबाट राजीनामा गर्ने छु । मेरो लडाइ अझै जारी छ र स्वीस अदालतबाट मैले सफाई पाउनेछु । उनले कासको निर्णयलाई न्यायपूर्ण नभएको बताएका छन् ।
युइएफएले मे १८ मा अब चालिने कदमबाट बारे निर्णय लिने बताइएको छ । त्यो बैठकले सम्भवतः युइएफएको कार्यवहाक अध्यक्ष तोक्नेछ । प्लाटिनी आफ्नो समयका विश्वकै उत्कृष्ट खेलाडीमध्येका एक हुन् । फ्रान्सका लागि ७२ खेल खेलेका उनले ४१ गोल गरेका थिए ।
