काठमाडौं – राष्ट्रिय फुटबल टोलीका पूर्व कप्तान राजुकाजी शाक्यले व्यवसायिक रुपमा फुटबल प्रशिक्षण दिनुका साथै बहुउद्देश्यका साथ नेसनल स्पोर्टस सेन्टर प्राली स्थापना गरेका छन् ।

६ जनाको संयक्त लगानीमा ललितपुर ९ च्यासलमा स्थित झन्डै ५ रोपनी जग्गा लिजमा लिएर सेन्टर स्थापना गरिएको हो । सेन्टरमा पौडी पोखरी, फुटबल÷फुटसल प्रशिक्षण , लन टेनिस,जिम, सावनाको पनि व्यवस्था छ । सेन्टरमा रेष्टुरेन्ट र कन्फ्रेन्स हल समेत रहेको छ । व्यवसायिक प्रयोजनको उद्देश्यका साथ स्थापना गरिएको सेन्टरमा बार्षिक, मासिक रुपमा सदस्य बनेर त्यहाँको सुविधा प्रयोग गर्न सकिनेछ । दैनिक रुपमा शुल्क तिररले पनि सेवा लिन सकिने बिहीबार आयोजित पत्रकार सम्मेलनमा नेपाली यू–२३ राष्ट्रिय टोलीका प्रशिक्षक शाक्यले जानकारी दिए ।

सेन्टरले प्रति व्यक्तिका लागि बार्षिक ३० हजार र मासिक ७ हजार पाँच सय शुल्क तोकेको छ । अलग अलग खेलका लागि छुट्टा छुट्टै शुल्क निर्धारण गरिएको छ । स्थानिय रामलाल ब्यञ्जनकार, यामबहादुर खत्रीसहित शाक्य अध्यक्ष रहेको सञ्चालन समितिमा अखिल नेपाल फुटबल संघ (एन्फा) का केन्द्रिय सदस्य दिनेश व्यञ्जनकार, एनआरीका पूर्व कप्तान सुरेन्द्र श्रेष्ठ पनि साझेदार रहेका छन् । झन्डै ३ करोड रुपैयाँको लागतमा तयार भएको सेन्टर जेठ १ गतेबाट औपचारिक रुपमा सञ्चालनमा आउने बताइएको छ ।

सेन्टरले बिहीबार नेपाल खेलकुद पत्रकार मञ्चसँगको मैत्रीपूर्ण फुटसल पनि आयोजना गरेको थियो । जसमा मञ्च १३–५ ले विजयी भयो । विजयी टोलिका लागि निशान राइले चार गोल गरे भने सुबास हुमागाईंले तिन गोल गरे| आदर्श ढकाल र बासु अवालले पनि दुइ-दुइ गोल थपेका थिए भने प्रज्वोल शाक्य र प्रजित शाक्यको नाममा एक एक गोल रह्यो| घरेलु टोलीबाट राजु काजी शाक्य, दिनेश ब्यन्जनकार, सुरेन्द्र श्रेष्ठ लगाएतका खेलाडीले खेलेका थिए|

शाक्यले फुटबल प्रशिक्षणका लागि लक्षित गरेर सेन्टरको स्थापना गरेको बताए । ‘ग्रासरुटबाट फुटबलको विकासका लागि यस्ता सेन्टर देशव्यापी रुपमा खुल्नुपर्छ । अनि मात्र हामीले भविष्यमा राष्ट्रिय टोलीमा पनि राम्रो खेलाडी तयार पार्न सक्छौं,’ उनले भने,‘ म आफै प्रशिक्षण गराउँछु । प्रशिक्षक पुगेन भने अरुलाई हायर पनि गर्छौ ।’ खेलजीवन पछि पनि स्वदेशमै केही गर्न सकिन्छ भन्नका लागि पनि सेन्टरको स्थापना गरेको शाक्यको भनाई थियो ।

शाक्य प्रशिक्षक रहेको यू–२३ टोलीले फागुनको पहिलो साता भारतमा सम्पन्न १२ औं दक्षिण एसियाली खेलकुद (साग) मा स्वर्ण पदक जितेको थियो । शाक्यले खेलाडीका रुपमा सन् १९८४ र १९९३ मा सागको पहिलो र छैटौं संस्करणमा नेपालका लागि स्वर्ण पदक जितेका थिए । १९९३ मा शाक्य राष्ट्रिय टोलीको कप्तान थिए ।