काठमाडौं (हाम्रो खेलकुद) – भारतीय महिला लिग फुटबलमा सेथु फुटबल क्लबलाई च्याम्पियन बनाउँदै नेपाली राष्ट्रिय महिला टोलीका दुई खेलाडी सावित्रा भण्डारी र अनिता बस्नेत शनिबार स्वदेश फर्केका छन् ।

सेथुलाई च्याम्पियन बनाउनमा महत्वपूर्ण भूमिका खेल्ने मध्ये सावित्रा एक थिइन् । टोलीले खेलेका ७ खेलमा उनले १५ गोल गरिन् । १ खेलमा बाहेक उनले सबैमा गोल गरिन् । १ खेलमा बाहेक उनी सबैमा पहिलो रोजाईमा परिन् ।
सावित्रा को दाँजोमा अनिताले भने कम मात्र मौका पाएकी थिइन् । त्यहाँको महिला लिगमा एक पटकमा एक विदेशी खेलाडीले मात्र खेल्न पाउने प्रावधानका कारण अनिताले कममात्र मौका पाइन् । उनले एउटा खेलमात्र पहिलो रोजाईमा खेल्ने मौका पाइन् । उनले एक गोल गरेकी थिइन् ।

सावित्रा र अनिता दुवै नेपाली महिला टोलीका महत्वपूर्ण खेलाडी रहँदै आएका छन् । चैतमा विराटनगरमा भएको साफ महिला च्याम्पियनसिपमा नेपाललाई फाइनल पुर्याउनका लागि सावित्रा र अनिताले आ आफ्नोतर्फबाट योगदान गरेका थिए ।

सावित्राले त्यहि प्रतियोगिताका दौरान आफुलाई नेपालीका लागि सर्वाधिक गोल गर्ने महिला खेलाडीको दोस्रो स्थानमा पुरएकी थिइन् । उनको अन्तर्राष्ट्रिय गोल संख्या २८ पुगेको छ । शीर्षस्थानमा रहेकी अनु लामाको नाममा ३५ गोल रहेको छ ।

एपिएफबाट घरेलु फुटबल खेल्दै आएका सावित्रा र अनिताले विदेशी भूमिमा व्यावासयिक फुटबल खेलेको यो दोस्रो पटक हो । यसअघि यी दुवैले माल्दिभ्स गएर फुटबल खेलेका थिए । स्वदेश फर्केपछि सावित्राले दक्षिण एसियाली राष्ट्र बाहिर पनि मौका पाएको खण्डमा आफुलाई प्रमाणित गर्न सक्ने विश्वास व्यक्त गरिन् ।

अखिल नेपाल फुटबल संघ (एन्फा) का मानार्थ उपाध्यक्ष शिक्षित पराजुली, एन्फा सदस्य पेमा डोम्ला, ओलम्पियन संगिना बैद्यलगायतले सावित्रा र अनितलाई त्रिभुवन विमानस्थलमा स्वागत गरेका थिए ।