एजेन्सी – स्टार फरवार्ड रोवर्ट लेवान्डोस्कीको दुई गोल मद्दतमा साविकको विजेता बायर्न म्युनिख जर्मन कप च्याम्पियन बनेको छ ।
बर्लिनमा शनिबार राति भएको खेलमा बायर्नले आरबी लेपिजिजलाई ३–० ले पराजित गर्दै लगातार जर्मन कप च्याम्पियन बनेको हो । पछिल्लो १९ वर्षमा बायर्नले १२औं पटक दोहोरो उपाधि जित्न सफल भएको हो । बायर्नले यसअघि जर्मन बुन्डेस लिगा जितिसकेको थियो ।
बायर्नका लागि अर्काे गोल किङ्सले कोमानले गरे । एकपक्षीय खेलमा बायर्नले २९औं मिनेटमा रोवर्ट लेवान्डोस्कीको गोलबाट अग्रता बनाएको थियो । उनले डेभिड अलावाको पासलाई सदुपयोग गरेका थिए ।
पहिलो हाफमा १–० को अग्रता बनाएको बायर्नले खेल सकिन १२ मिनेट बाँकी रहँदा दुई गोल गर्दै जित पक्का गरे । ७८औं मिनेटमा किङ्सले कोमानले गोल गरेपछि बायर्न २–० ले अघि बढ्यो ।
८५औं मिनेटमा रोवर्ट लेवान्डोस्कीले व्यक्तिगत दोस्रो तथा टिमका लागि तेस्रो गोल गर्दै बायर्नलाई उपाधि दिलाए । लेपिजिजले सुरुवाती समयमा बायर्नलाई दवावमा राखेपनि सोही लयलाई कायम राख्न सकेनन् ।
च्याम्पियन बनेसँगै दुई भेट्रान्स आर्जेन रोवेन र फ्रान्क रिवेरीले बायर्नबाट अर्काे उपाधि थप्दै बायर्नबाट अन्तिम खेले खेलेका छन् । उनीहरु दुवैले यो सिजनसँगै बायर्न छाड्दैछन् ।लेपिजिजविरुद्धको खेलमा दुवै खेलाडी वैकल्पिक खेलाडीको रुपमा दोस्रो हाफमा मैदान प्रवेश गरेका थिए ।
यस्तै प्रशिक्षक निको कोभाक खेलाडी र प्रशिक्षकको रुपमा एकै सिजन दुई उपाधि जित्ने बायर्नको पहिलो प्रशिक्षक बनेका छन् । निकोले खेलाडी जीवनमा पनि बायर्नबाट उपाधि जितेको थियो ।
