एजेन्सी – लिभरपुलका डिफेन्डर भर्जिल भान डाइक यस वर्षको ब्यालोन डि’ओरको दौडमा लियोनल मेस्सी र क्रिस्टियानो रोनाल्डो भन्दा अगाडी रहेको मानिएको छ ।

२७ वर्षे भान डाइन सन् २०१८ मा ७५ मिलियन पाउन्डमा लिभरपुल भित्रिएका थिए । गत सिजन लिभरपुललाई च्याम्पियन्स लिगको उपाधि जिताउनमा भान डाइकको ठूलो भुमिका रहेको थियो । सिजन अवधिभर भान डाइनले २१ क्लिन सिट राख्न समेत मद्दत गरेका थिए ।

उनको प्रदर्शन स्वरुप उनले पिएफएको उत्कृष्ट खेलाडीको उपाधि जितेका थिए । सन् २००५ मा चेल्सीका जोन टेरीले सो उपाधि जितेयता कुनै पनि डिफेन्डरले पिएफएको उत्कृष्ट खेलाडीको उपाधि जितेका थिएनन् ।

सेप्टेम्बरमा हुने ब्यालोन डि’ओरको समारोह अगाडी भान डाइक ले अधिकांश बेटिङ साइटहरुमा अग्रस्थान ओगटेका छन् । स्काई बेट अनुसार भान डाइक पछि मेस्सी, रोनाल्डो र लिभरपुलका मोहम्मद सालाह यस वर्षका दाबेदार रहेका छन् ।

गत महिनाको कोपा अमेरिकाबाट बाहिरिनु अघि भने मेस्सी अग्रस्थानमा रहेका थिए । भान डाइकले नेदरल्यान्ड्सबाट पनि उच्च प्रदर्शन गरेकाले उनी पहिलो स्थानमा उक्लिएको बुझिएको छ ।

अर्को लोकप्रिय खेलकुद मिडिया स्पोर्ट्स बाइबलले गरेको जनमतमा भने प्रशंसकहरुले मेस्सी यस वर्षको हकदार रहेको बताए । ५४ प्रतिशत प्रशंसकले मेस्सीलाई चुने भने ४० प्रतिशत मात्रले भान डाइक चुनेका थिए ।

मेस्सी र रोनाल्डोले ५-५ पटक ब्यालोन डि’ओरको उपाधि जितेका छन् भने गत वर्ष १०-वर्षे मेस्सी-रोनाल्डो प्रभुत्व तोड्दै क्रोएसियाका कप्तान लुका मोड्रिचले सो उपाधि हात पारेका थिए ।

सन् २००६ मा इटालीलाई विश्वकप जिताउंदै कप्तान फाबियो कानाभारोले ब्यालोन डि’ओर हात पारेका थिए । उनी २१ औं शताब्दीमै ब्यालोन डि’ओर जित्ने एक्लो डिफेन्डर हुन् ।

के भान डाइकले मेस्सी र रोनाल्डोलाई उछिन्दै ब्यालोन डि’ओरको उपाधि उचाल्लान्?