एजेन्सी – इंग्लिस प्रिमियर लिग फुटबलको तेस्रो राउन्डमा आज तीन खेल हुँदैछन् ।

साविकको विजेता म्यानचेस्टर सिटीले बर्नमाउथको भ्रमण गर्दैछ । खेल साँझ ६ः४५ बजेपछि हुनेछ । आजै टोटेनहम हस्टपरले न्यु क्यासल युनाइटेडको र वुल्भ्सले बर्नलीसँग खेल्दैछ । वेस्टह्याम युनाइटेडमाथि ५–० को जितसँगै प्रिमियर लिगमा दमदार शुरुवात गरेको सिटी दोस्रो खेलमा टोटेनहमसँग २–२ गोलको बराबरीमा रोकिएको थियो ।

यस्तोमा सिटी प्रिमियर लिगमा दोस्रो जितको खोजीमा हुनेछ । सिटी जित निकाल्दै शीर्षस्थानको लिभरपुलसँगको अंकदुरी छोट्याउने योजनामा हुनेछ । बर्नमाउथविरुद्ध सिटीको इतिहास निकै राम्रो छ । प्रिमियर लिगमा पछिल्ला १४ भेटमा सिटी अपराजित छ । जसमा १२ जित र दुई बराबरी छ ।

सिटी यही प्रदर्शनलाई निरन्तरता दिन चहान्छ । बर्नमाउथविरुद्ध सिटीका लागि रहिम स्ट्रलिङ, सर्जियो अगुइरो, बर्नार्डो सिल्भा र केभिन डि ब्रुयन मुख्य हतियार हुनेछन् । तर, पछिल्ला खेलमा निकै उच्च प्रदर्शन गरिरहेको बर्नमाउथविरुद्ध सिटी सचेत भएर मैदान उत्रनेछ ।

यता, बर्नमाउथ घरेलु मैदानमा सिटीलाई स्तब्ध पार्ने दाउमा हुनेछ । पहिलो खेलमा सेफिल्डसँग १–१ को बराबरीमा रोकिएको बर्नमाउथले दोस्रो खेलमा एस्टन भिल्लामाथि २–१ को जित निकालेको थियो । बलियो सिटीविरुद्ध बर्नमाउथ अंक खोस्ने लक्ष्यमै रहनेछ । बर्नमाउथ सिटीसँगको पछिल्ला १४ खेलमा जित हात पार्न नसकेको जिन्कलाई पनि तोड्ने लक्ष्यमा हुनेछ । लिगमा सिटी र बर्नमाउथको समान ४ अंक छ । प्रिमियर लिगमै आज टोटेनहमले घरेलु मैदानमा न्यु क्यासल युनाईटेड तथा वल्भ्सले बर्नलीको सामना गर्नेछ । दुवै राति खेल ९ः१५ बजेपछि हुुनेछ ।

टोटेनहम दोस्रो जितको खोजीमा रहँदा अंकविहीन न्यु क्यासल पहिलो जितको खोजीमा हुनेछ । यस्तै अपराजित रहेको वल्भ्स बर्नलीलाई पराजित गर्दै लिगमा पहिलो जितको खोजीमा हुनेछ । वल्भ्सले यसअघिका दुवै खेल बराबरी खेलेको थियो । बर्नलीले १ जित र १ हार बेहोरेको छ ।