काठमाडौं (हाम्रो खेलकुद) – ललित स्मृति यु–१८ फुटबल प्रतियोगिताको उद्घाटन खेलमा लक्ष्मी हुन्डाई मनाङ मस्र्याङ्दी र एपिएफ भिड्ने भएका छन् । अखिल नेपाल फुटबल संघ (एन्फा) का कार्यवहाक अध्यक्ष ललिकृष्ण श्रेष्ठको बर्ष दिनको पून्य तीथि पारेर आयोजना गर्न लागिएको प्रतियोगिता उद्घाटन खेल एन्फा कम्प्लेक्स सातदोबाटोमा हुनेछ भने बाँकी खेलहरु दशरथ रंगशालामा हुने भएका छन् । गत बर्ष जेठ २९ गते भैंसीपाटीस्थित नयाँ घरमा सरेकै दिन करेन्ट लागेर श्रेष्ठको मृत्यु भएको थियो ।
स्वर्गिय लतिलकृष्ण श्रेष्ठ ।
शनिबार नै एन्फाले प्रतियोगिता सुरु सँगै स्वर्गिय श्रेष्ठको शालिक अनावरण समेत गर्ने भएको छ । ए डिभिजन क्लबका ८ र गत बर्ष राष्ट्रिय लिग खेल्ने राजधानीबाहेकका ४ गरि १२ टोलीले प्रतियोेगितामा प्रतिस्पर्धा गर्ने एन्फाले जनाएको छ । सहभागि टोलीलाई चार समूहमा विभाजन गरिएको छ भने हरेक समूहमा ३ टोली छन् ।
लिग कम नकआउटपछि हरेक समूहका शीर्ष दुई टोली क्वार्टरफाइनलमा प्रवेश गर्नेछन् ।
पहिलो पटक आयोजना हुन लागेको यू १८ को समुह ‘ए’ मा एपिएफ, र मनाङबाहेक झापा–११ छ । समूह ‘बी’ मा जावलाखेल युथ क्लब, त्रिभुवन आर्मी र लुम्बिनी छन् ।
राष्ट्रिय लिग च्याम्पियन रुस्लान थ्रीस्टार, संकटा र सुदुरपश्चिम समुह ‘सी’ तथा नेपाल पुलिस, मोरङ र सरस्वती क्लब समूह ‘डी’ मा छन् । स्वर्गिय लामो समय थ्री स्टारको अध्यक्ष रहेका थिए ।
ललित स्मृति प्रतियोगिताको विजेताले ३ लाख र दोस्रो हुने टोलीले १ लाख ५० हजार रुपैयाँ प्राप्त गर्नेछन् । फाइनल असार ११ गते हुनेछ । प्रतियोगिताको उत्कृष्ट गोलकिपर, रक्षक, मिडफिल्डर र स्ट्राइकर जनही १५ हजार पाउनेछन् ।
काठमाडौंका १२ ए डिभिजनमध्ये ८ क्लबले मात्र यो प्रतियोगितामा भाग लिनेछन् । मछिन्द्र र ब्रिगेड ब्वाइज क्लब (बिबिसी) ले टोलीका तयारी नभएको भन्दै नखेल्ने जानकारी गराएको एन्फाका प्रमुख कार्यकारी अधिकृत (सिइओ) इन्द्रमान तुलाधरले यसअघि नै जानकारी दिइसकेका छन् । अन्य दुई क्लब हिमालय शेर्पा र फ्रेन्ड्स क्लबमाथि भने एन्फाले गत बर्ष गरेको कारवाही फुकुवा भइ नसकेकाले सहभागि नगराइएको एन्फाले जनाएको छ ।
