सुबास हुमागाईं,सिड्नी

राष्ट्रिय फुटबल टोली विश्व कप छनोटको अर्को अवे खेलका लागि अष्ट्रेलियाबाट शुक्रबार जोर्डन प्रस्थान गर्दैछ । नेपाल र जोर्डनबीच अम्मान अन्तर्राष्ट्रिय रंगशालामा मंगलबार (असोज २७ गते) प्रतिस्पर्धा हुनेछ ।

टोली शनिबार जोर्डन समय अनुसार दिउँसो १ः०० बजे पुग्ने नेपाली टोलीका व्यवस्थापक मधुसुदन उपाध्यायले हाम्रो खेलकुदलाई जानकारी दिए । समूह ‘बी’अन्तर्गत बिहीबार क्यानबेरामा भएको खेलमा नेपाल घरेलु टोली अष्ट्रेलियासँग ५–० ले पराजित भएको थियो ।

समूहको अर्को खेलमा जोर्डनले कुवेतसँग गोलरहित बराबरी खेलेको थियो । अष्ट्रेलिया ६ अंकका साथ शीर्षस्थानमा छ भने समान ४ अंक भएका कुवेत दोस्रो, जोर्डन तेस्रो स्थानमा छ । ३ अंकसहित नेपाल चौथो स्थानमा रहँदा अंक विहिन चाइनिज ताइपे पुछारमा छ ।

गत महिना कुवेतसँग ७–० को हार बेहोर्दै विश्व कप छनोटको यात्रा सुरु गरेको नेपालले अर्को खेलमा चाइनिज ताइपेलाई २–० ले हराएको थियो । चाइनिज ताइपेविरुद्ध दुवै गोल अन्जन विष्टले गरेका थिए ।

जोर्डनसँग यसअघि सन् २०११ मा पनि विश्व कप छनोटको प्रतिस्पर्धा भएको थियो । जसमा नेपाल अवे खेलमा ९–० ले पराजित भएको थियो । पाँच दिन पछि दशरथ रंगशालमा भएको खेलमा नेपाल र जोर्डनले १–१ को बराबरी खेलेका थिए ।

त्यति बेला भरत खवासको गोलमा नेपालले अग्रता बनाएको थियो । यद्दपी नेपाले अग्रता जोगाउन सकेन । यसपटक जोर्डनसँगको खेल सँगै नेपालको अवे खेल सकिनेछ । बाँकी ४ खेल नेपालले दशरथ रंगशालामा खेल्नेछ ।