एजेन्सी – पछिल्लो एक साता युरोपियन राष्ट्रबीत युरोकप छनोट खेल चलिरहेको छ । दक्षिण अमेरिका, उत्तर अमेरिका र अफ्रिकी राष्ट्रहरु मैत्रीपुर्ण खेलमा व्यस्त रहँदा एसियन राष्ट्र भने कतार विश्वकप २०२२ र एसियन कप २०२३ को छनोटमा व्यस्त छन् ।

एक सातामा एसिया केही राष्ट्रले विश्वकप छनोटका दुई खेल खेले । नेपालले पनि अष्ट्रेलिया र जोर्डनसँग उसकै भुमिमा छनोटको खेल खेल्यो ।  नेपालले दुवै खेलमा ५–० र ३–० ले विपक्षीलाई नतिजा सुम्पियो ।

दक्षिण एसियाको बलियो राष्ट्र भारतले आयोजक कतारलाई गोलरहित बरारबरीमा रोकेपनि पछिल्लो खेलमा बंगलादेशसँगको हारबाट बालबाल बच्यो । कतारले ओमानलाई पराजित गर्दै शीर्ष स्थानमा कायमै रहन सफल भयो ।

मंगलबार राति विश्वकप छनोटमा यस्तो खेल पनि रह्यो । जसलाई कसैले चाल पाएनन् । त्यो छनोटको खेल थियो । दुई कोरिया दक्षिण र उत्तरबीचको खेल । दुई कोरियाबीच खेल हुने यसअघि नै तय थियो । तर, त्यो खेल कुन समयमा कसरी भयो, कसैलाई थाहा भएन ।

खेलको न प्रत्यक्ष प्रशारण थियो, न त विदेशी पत्रकार नै उपस्थित थिए, अझ भनौ ५० हजार दर्शक क्षमताको रंगशालाको प्याराफिटमा एक जना पनि दर्शक उपस्थित थिएनन् । उत्तर कोरियाको प्योङयाङमा खेलिएको त्यो अति गोप्य खेल गोलरहित बराबरीमा सकियो । दुवैले अंक बाँडे ।

विश्वकप छनोटको खेल उत्तर कोरियामा यी दुई टोलीबीच १९९० पछि पहिलो खेल थियो । गतवर्ष दक्षिण कोरियमा भएको विन्टर ओलम्पिकमा दुवै राष्ट्र एक झन्डा मुनि बस्दै दुई देशबीचको युद्धलाई शान्त पार्न पुलको काम गरिएको भन्ने विश्वास थियो । तर, किमको अमेरिकासँगको वार्ता विघटनपछि दुई कोरियाबीच उत्तिकै द्धन्द्ध सुरु भइसकेको छ । सोही कारण यी दुई देशबीचको खेलको कसैले पनि भेउ पाएनन् ।

दक्षिण कोरियाबाट खेलाडी र अफिसियलसँगै अन्य दुई जनालाई टोलीसँगै पठाएको थियो । उनीहले नै कोरियन फुटबल फेडेरेसनमा खेलबारे जानकारी दिएका थिए । कडा सुरक्षाकाबीच भएको गोप्य खेलमा उत्तर कोरियाका किम जोङको सरकारले खेल हेर्न दक्षिण कोरियाका कसैलाई पनि अनुमति दिएको थिएन ।

उत्तरले खेलपछि र दक्षिणका खेलाडीहरु स्वदेश फर्किएपछि खेलको भिडियो टेप र केही तस्बिरहरु दिन सहमत भएको थियो । दक्षिणका खेलाडीहरु फर्किएपछि खेलको फुटेज र केही तस्बिरहरु विभिन्न सञ्चारमाध्यममा पोस्ट भएको थियो ।

समूह ‘एच’ मा दक्षिण कोरिया ३ खेलबाट ७ अंक जोडेर शीर्षस्थानमा रहदा समान खेलबाट समान ७ अंक रहेपनि उत्तर दोस्रो स्थानमा छ । लेवनान ६ अंक जोडेर तेस्रा, तुर्केमिनिस्तान ३ अंकसहित चौथो तथा श्रीलंका अंकविहीन हुदै पुछारमा छ । दुई कोरियाबीचको अर्को खेल २०२० जुनमा दक्षिण कोरियाको सियोलमा हुनेछ।