काठमाडौं (हाम्रो खेलकुद)– राष्ट्रिय फुटबल टोली १६ दिनपछि स्वदेश फर्कदैछ । विश्व कप छनोटको समूह चरणमा २ खेलपछि फुटबल टोली बिहीबार जोर्डनबाट स्वदेश आउन लागेको हो । जोर्डनसँग मंगलबार भएको खेल नेपालले ३–० ले गुमाएको थियो ।

त्यसको ५ दिन अघि असोज २३ गते टोलीले क्यानबेरामा अष्ट्रेलियासँग खेलेको थियो । जुन खेलमा नेपाल ५–० ले पराजित भएको थियो । अष्ट्रेलियासँगको खेलअघि नै तयारीका लागि भन्दै नेपाली टोली असोज १५ गते त्यसतर्फ गएको थियो । त्यहिबाट टोली जोर्डन पुगेको थियो ।

गत महिनाबाट सुरु भएको विश्व कप छनोट दोस्रो चरणका ४ खेल सकिँदा नेपालले १ मा जित र बाँकी सबैमा हार बेहोरेको छ । भदौ १९ गते भएको कुवेतसँगको खेल ७–० ले गुमाएको नेपालले भदौ २४ गतेको खेलमा भने चाइनिज ताइपेलाई २–० ले हराएको थियो । दुवै गोल युवा स्टार अन्जन विष्टले गरेका थिए । नेपालले ४ खेलमा १५ गोल खाइसकेको छ भने २ गोलमात्र फर्काउन सकेको छ ।

नेपाली टोलीले जोर्डनसँग खेल्दा ८ वर्षअघिको नतिजालाई स्मरण गरेका थिए । विश्व कप छनोटकै खेलमा त्यति बेला नेपाली टोली जोर्डनसँग ९–० ले पराजित भएको थियो । त्यसको ५ दिन पछि दशरथ रंगशालामा नेपाल र जोर्डनको खेल १–१ को बराबरीमा टुंगिएको थियो ।

त्यो खेलमा नेपालले अग्रता जोगाउन सकेन । यसपटक अवे खेलमा यसअघिको नतिजा दोहोरिन भने पाएन । यसपटक जोर्डन दोस्रो हाफमा मात्र गोल गर्न सफल भएको थियो । पहिलो हाफ गोलरहित बराबरीमा टुंगिएको थियो ।