काठमाडौं (हाम्रो खेलकुद)– बंगलादेशमा जारी शेख कमल अन्तर्राष्ट्रिय क्लब कपमा नेपाली क्लबको सहभागिता छैन । रुस्लान थ्री स्टार क्लब खेल्ने भनिएपनि अन्तमा टोली सहभागी भएन । नेपाली खेलाडीका रुपमा राष्ट्रिय टोलीका फरवार्ड विमल घर्तीमगरले माल्दिभ्सको टिसी स्पोर्टस्बाट खेलेका थिए ।

तर, विमलको टोली समूह चरणबाट बाहिरिएको थियो । अघिल्लो संस्करणमा सिग्नेचर मनाङ मस्र्याङ्दी क्लबले खेलेको थियो । त्यो संस्करणमा टिसी स्पोर्टसले उपाधि जितेको थियो । त्यति बेला टिसी स्पोर्टसको गोलकिपर राष्ट्रिय टोलीका कप्तान किरण चेम्जोङ थिए ।

यसपटक फाइनलमा खेलाडी वा क्लब नभएपनि फाइनलमा नेपालीको उपस्थिति रहने भएको छ । फिफा रेफ्री सुदीश पाण्डेले फाइनल खेलाउने भएका छन् । बंगलादेशको चटग्राम अबहानी लिमिटेड र मलेसियाको टेरेन्गुना एफसीबीच आज साँझ हुने फाइनल सुदीशले खेलाउने छन् । फाइनलमा उनका सहायकमा नेपाली फिफा सहायक रेफ्री रोजन श्रेष्ठ र श्रीलंकाका धन्कुशका सम्पथ रहेका छन् । फोर्थ अफिसियलमा असान्था पि डायस छन् ।

प्रतियोगितामा नेपाल, बंगलादेश, जोर्डन, श्रीलंका र इन्डोनेसियाका गरि १६ रेफ्री रहेका छन् । यस्तोमा फाइनल खेलाउनु पाउनु आफ्नो लागि व्यक्तिगत रुपमा खुसी लाग्नु स्वभाविक हुँदै भने, देशको प्रतिनिधिका रुपमा यस्तो मौकाले पाउँदा गर्व महसुस हुने रहेछ । च्याम्प्यिनसिपमा समूह चरणका २ खेल खेलाएका सुदीशले ३ खेलमा फोर्थ अफिसियलको भूमिका निर्वाह गरिसकेका छन् ।

सन् २०११ मा फिफा रेफ्री बनेका सुदीश यो अवस्थामा आइपुग्नका लागि अनुशासन, मेहनत र प्रदर्शननै मुख्य रहेको बताएका छन् । १७ वर्ष देखि रेफ्रीको भूमिका निर्वाह गर्दै सुदीशले २००७ देखि २००९ सम्मको एफसी प्रोजेक्ट कोर्षमा सहभागी हुँदै उनको अन्तर्राष्ट्रिय रेफ्री करियरको यात्रा सुरु भएको थियो । उनले अहिले सम्म एसियन गेम्सको छनोन, एएफसी च्याम्पियन्स लिग, एएफसी कप, साफ च्याम्पियनसिप (२०१३,२०१५), एसइए गेम्स, अन्तर्राष्ट्रिय मैत्रीपूर्णका विभिन्न खेल सञ्चालन गरिसकेका छन् ।