काठमाडौं – अखिल नेपाल फुटबल संघ (एन्फा) ले अष्ट्रेलियाका ग्यारी माइकल फिलिप्सलाई टेक्निकल डाइरेक्टर (प्राविधिक निर्देशक) मा नियुक्त गरेको छ । गत सोमबारै नेपाल आइपुगेका ग्यारीलाई बिहीबार एन्फाले प्राविधिक निर्देशक नियुक्त गर्दै स्वागत गरेको हो । ग्यारीलाई एन्फा अध्यक्ष कर्माछिरिङ शेर्पा, उपाध्यक्ष उपेन्द्रमान सिंह,  प्रशिक्षकहरुले स्वागत गरे ।

उनी एक वर्षको लागि प्राविधिक निर्देशकमा नियुक्त भएका हुन् ।। टेक्निकल डिरेक्टर नियुक्त भएसँगै ग्यारीले नेपाली फुटबलको रणनीतिदेखि खेल्ने शैलीको बिषयमा अनुसन्धान तथा विकासका साथै ग्रासरुट फुटबलदेखि युवा फुटबल विकासको परियोजनाको रणनीति बनाउने छन् । यसअघि एन्फाको प्राविधिक निर्देशकमा जापानका ताकेदा रहेका थिए ।

अष्ट्रेलियाका पूर्व मिडफिल्डर ग्यारीले एक दशक बढी लामो समय अष्ट्रेलियाको सिड्नी ओलम्पिक फुटबल क्लबमा बिताएका थिए । त्यसपछि उनले ब्रिसबन स्ट्राईकर्सबाट ब्यवसायिक फुटलब खेलेका थिए । सिड्नीबाट उनले खेलाडी र प्रशिक्षकको रुपमा समेत उपाधि जितेका छन् ।

फिलिप्स २००९ मा मलेसियन प्रिमियर लिगको सवह एफएको प्रशिक्षकका साथै प्राविधिक निर्देशक बनेका थिए । उनले २०१५ मा पपुवा न्युगिनीको राष्ट्रिय महिला फुटबल टिमको समेत नेतृत्व गरेका थिए । त्यसपछि पुनः मलेसिया फर्किएको ग्यारीले मलेसियन प्रिमियर लिगका विभिन्न क्लबलाई प्रशिक्षण दिएका थिए ।