एजेन्सी – साविकको स्पेनिस ला लिगा विजेता क्याटलान क्लब बार्सिलोना लेभान्तेसँग स्तब्ध बनेको छ । बार्सिलोना घरेलु टोली लेभान्तेसँग ३–१ ले पराजित भएको हो ।

लेभान्तेमा शनिबार राति भएको खेलमा बार्सिलोनालाई स्तब्ध बनाउन जोस कम्पाना, बोर्जा मायोरल र नेमान्जा राडोजाले गोल गरे । दोस्रो हाफको सात मिनेटको अन्तरमा ३ गोल खाएपछि बार्सिलोना खेलमा पछाडी परेको थियो । त्यसअघि बार्सिलोनका कप्तान लिओनेल मेस्सीले सुरुवाती गोल गरेका थिए । मेस्सीले पहिलो हाफमा पेनाल्टीमार्फत गोल गर्दै बार्सिलोनालाई अग्रता दिलाएका थिए ।

खेलको ३६ औं मिनेटमा बार्सिलोनाका नेल्सन सेमेडोलाई लेभान्तेक जोर्गे मिरामनले लडाएपछि रेफ्रीले बार्सिलोनालाई पेनाल्टी दिएका थिए । उक्त पेनाल्टीलाई मेस्सीले गोलरक्षकले डाइभ दिएको विपरित दिशामा प्रहार गर्दै अग्रता दिलाएका थिए । त्यसअघि लगातार आक्रमण बुनेको बार्सिलोनालाई लेभान्तेको डिफेन्सले रोकेको थियो ।

बार्सिलोनाले पहिलो हाफको २ मिनेट समय बाँकी रहँदा अग्रता दोब्बर पार्ने अवसर गुमायो । गोलरक्षक आइटर फर्नान्डेज पोजिसनमा नभएको अवस्थामा मेस्सीको प्रहारले पोस्टको दिशा लिन सकेन । मेस्सीको पेनाल्टीमा नै अग्रता लिएको बार्सिलोनाले दोस्रो हाफमा भने लयलाई कायम राख्न सकेन ।

दोस्रो हाफको सुरुवाती समयदेखि नै लेभान्तेले विपक्षी डिफेन्सलाई समस्या दिएको थियो । ६० औं मिनेटमा जोसे काम्पानाले डिफेन्सको कमजोरीको फाइदा उठाउँदै खेल बराबरीमा ल्याए । त्यसको तीन मिनेट नबित्दै घरेलु टोलीले अग्रता लियो । कम्पानाको पासमा रियल म्याड्रिडका पूर्व खेलाडी बोर्जा मायोरलले उत्कृष्ट फिनिस गर्दै लेभान्तेलाई अगाडी बढाए ।

दोस्रो गोल खाएको केहि मिनेटमा नै लेभान्तेले ३-१ को अग्रता लियो । फ्रिकिकमा क्लेमेन्ट लेङलेटले क्लियर गरेको बललाई नेमान्जा राडोजाले गरेको प्रहार डिफेन्सलाई लाग्दै गोलरक्षक मार्क आन्दर टेर स्टेगनलाई झुक्याउन सफल भयो । बार्सिलोनाले लगत्तै खेलाडी परिवर्तन गर्दै युवा फरवार्ड अन्सु फाटीलाई मैदान प्रवेश गराएको थियो ।

खेलको ७४ औं मिनेटमा मेस्सीले गोल फर्काएपनि भिडियो असिस्टेन्ट रेफ्री (भीएआर) ले उक्त गोललाई मान्यता दिएन । उक्त गोल गर्ने क्रममा एन्टोइन ग्रिज्मन पास दिने समयमा अफसाइड भएको भन्दै मेस्सीको गोल मान्य रहेको थिएन । त्यसपछि बार्सिलोनाले पर्याप्त अवसर सिर्जना गर्न सकेन र हार बेहोर्न बाध्य भयो ।

यो सिजनको ला लिगामा बार्सिलोनाको यो ११ खेलमा तेस्रो हार हो । यस्तै बार्सिलोनाको लगातार ८ खेल जित्ने यात्रामा समेत पुर्णविराम लागेको छ ।

हारपछि बार्सिलोनाले आफ्नो शीर्षतालाई मजबुत बनाउन चुकेको छ । बार्सिलोनाको ११ खेलबाट २२ अंक छ । एक खेल कम खेलेको रियल म्याड्रिडको २१ अंक छ । बार्सिलोनालाई पराजित गरेको लेभान्टे १७ अंक जोडेर आठौं स्थानमा उक्लिएको छ । रियलले शनिबार नै हुने खेलमा रियल बेटिसको सामना गर्दैछ ।